Ex-presidente Evo Morales, desde su residencia na Argentina, a comenta riba su regreso na su pais, unda e tin plan pa arma un milicia politico. “Si mi bolbe na Bolivia, mester organisa manera na Venezuela un milicia arma di pueblo,” Evo Morales a bisa durante un encuentro cu militantenan di su partido MAS na Buenos Aires. E audio di su declaracion polemico a keda publica pa radio Kawsachun Coca del Chapare, cu tin custumber di transmiti gran parti di su actividadnan na Argentina.
E ex-presidente a haci referencia na e Milicia Bolivariano, un di e gruponan arma di e dictadura Venezolano. Maduro ta usa nan pa vigila edificio publico, garantisa control di prijs y racionamento di producto den supermercado, y pa custodia entrega di e cahanan di alimento subsidia.
Morales a amplia riba Twitter con e ta planifica pa arma su hendenan. Su idea ta basa riba e “seguridad” cu e movimento indigena originario campesino “semper tabatin”. “Den algun region e tabata yama guardia comunal; den otro tempo: milicia. Awor, polis sindical o siguridad sindical. Tur cos den cuadro di nos uso y custumbernan, y respetando Constitucion,” el a skirbi.
Carlos Mesa, cu a competi contra Morales den e ultimo eleccion di aña pasa, a denuncia e lider di MAS pa fraude electoral: “Prome e kier a cerca e ciudadnan y awor ta sugeri pa arma gruponan iregulary violento pa enfrenta Bolivianonan y ehercito. E menasanan constante ey ta demostra e berdadero intencion di Evo Morales.”
E activista opositor Venezolano Tamara Suju tambe a condena e intencion di e ex-presidente di Bolivia. “Evo Morales, mustrando ken e ta abiertamente, ya ta papia di organisa paramilitar na su regreso. Asina, e ta uni su mes na e duo criminal Nicolas Maduro-Daniel Ortega,”el a skirbi riba su cuenta di Twitter.
