(Infobae) – E marcha lidera pa Evo Morales a sali for di e localidad di Achica Arriba rumbo pa La Paz pa 6’or di mainta, despues di un jornada violento entre su siguidor y partidario di Gobierno na Ventilla, El Alto, unda ainda ta persisti un vigilia.
Den anticipacion di e yegada di e manifestantenan, diadomingo ultimo a instala un cordon policial na Plaza Murillo y na sede di Obrera Bolivia Central, lesnan di scol en persona a keda suspendi na algun scol na El Alto y La Paz.
Segun cu e manifestantenan ta acerca e sede administrativo di e pais, Evismo y Arcismo ta midi nan forsa. Diadomingo, riba e di seis dia di e caminata, e hendenan a yega Achica Arriba sin incidente pero algun kilometer despues, na un lugar yama Ventilla, e militantenan di Gobierno a tene un manifestacion cu a termina den enfrentamentonan cu siguidonan di Morales. E enfrentamento a laga ocho persona herida y Polis a recuri na usa gas lagrimogeno pa dispersa e manifestantenan.
E mandatario di Salud, Maria Renee Castro, a informa na medionan di comunicacion cu tabata tin atakenan riba personal di salud y cu a tira piedranan contra ambulance. “Esey no ta sucede ni den un guera,” el a bisa y a acusa e siguidonan di e ex-presidente pa e atakenan.
Despues di e conflicto, e ex-mandatario a declara cu “kico cu nan haci, e pueblo lo recupera su revolucion” y a ratifica e entrada di e marcha pa La Paz, cu lo ser reenforsa pa gruponan cu ta yegando for di otro region di e pais. Sinembargo, Morales lo no tine asina facil: sectornan relaciona cu Arce kier stroba nan paso y un Asamblea na El Alto unda a haci un yamada na “e pueblo di El Alto pa no permiti entrada di e marcha di Evo Morales.”
Hasta tin esnan cu ta boga pa detencion di e hefe di Movimiento al Socialismo (MAS). Diadomingo, na e concentracion di siguidonan di Arces na Ventilla, e Confederacion Sindical Unico di Trahadonan Campesino a exigi aresto di e ex-presidente. “Enforsa nos Constitucion Politico di Estado y aresta e homber aki (Evo Morales) cu ta instiga violencia, ta creando sedicion y un intento di golpi di Estado,” lider Guery Garcia a bisa.
Despues di a haya sa di denuncianan di sector relaciona cu Gobierno tocante posibel “atakenan” riba e lider cocalero durante su entrada na La Paz y debi na e “miedo cu e lo ser deteni,” Morales a manda un carta pa e Secretario General di ONU, Antonio Guterres, pidiendo su intervencion di e organisacion, pa asina evita cu Gobierno ta “stroba” nan protesta cu “gruponan cu ta en realidad gruponan paramilitar.”
Mirando e insinuacionnan di confrontacion, e intercambio di acusacionnan entre un banda y e otro no ta stop. Ex-minister y miembro di e ekipo huridico di Evo Morales, Carlos Romero, a denuncia cu Gobierno tin un strategia pa comete un “genocidio cobarde y criminal” contra mobilisacion social. Di su banda, e actual minister di Interior, Eduardo Del Castillo, a declara cu e ex-mandatario “ta sigui cu su plan pa yena Bolivia cu sanger y morto. “Nos ta bay actua manera e Constitucion ta manda.”
