Presidente Evo Morales y su vice-presidente Alvaro Garcia Linera a renuncia ayera den oranan di atardi, despues cu el a bay den refugio den su base electoral mas fuerte, den departamento Cochabamba.
Forsanan arma di Bolivia a exigi ayera mainta renuncia di presidente Evo Morales, despues cu esaki mas tempran a anuncia eleccion nobo. “Nos ta sugeri na e presidente di estado cu e ta renuncia su mandato presidencial,” hefe di alto mando militar Willimas Kalima a bisa den conferencia di prensa. Mientras tanto e manifestacionnan contra e presidente tabata continua ayera na varios parti di e pais, a pesar cu Morales a anuncia eleccion nobo, despues cu un informe di Organisacion di Estadonan Americano (OEA), a revela multiple iregularidad den eleccion di dos siman pasa.
Alto mando militar a urgi tambe e “sectornan mobilisa” pa para tur accion di violencia cu ta sacudi e pais, tumando na cuenta bida y seguridad di e poblacion, y na e presidente a exigi su renuncia, “pa asina permiti e pacificacion y mantenimento di stabilidad pa bon di nos Bolivia,” segun Kalima.
E polisnan cu a join e manifestantenan civil tabata custodiando Plaza de Armas, unda Casa de Gobierno ta situa, pa evita cu e forsanan campesino leal na Morales por drenta. Morales no ta controla cuerpo policil desde diabierna pasa, ora nan a uni na e protestanan.
Morales asplica cu el a tuma su decision “pa Carlos Mesa y Fernando Camacho no sigui persiguiendo mi rumannan, dirigentenan sindical”, refiriendo na e atakenan riba funcionarionan di gobierno di Morales.
Luis Fernando Camacho cu a encabesa e protestanan y un caravana grandi di opositor a biaha di tur parti di e pais pa La Paz. Ex-candidato Carlos Mesa tambe a apoya e protestanan: “Mientras no tin un resolucion final pa e proceso aki, e pueblo ta keda mobilisa.”
