Presidente Evo Morales ta lidera encuesta di preferencia di voto na Bolivia pa eleccion presidencial aki tres siman, aunke e lo perde na december un segundo vuelta contra opositor Carlos Mesa, segun un sondeo publica diadomingo pasa pa prensa local.
Morales a haya 33% di e intencion di voto contra 26% di Mesa pa eleccion di dia 20 di october venidero, mientras e diferencia entre nan a reduci cu un punto compara cu e encuesta di augustus, segun e diario Pagina Siete.
E resultado aki lo forsa un segundo vuelta pa dia 15 di december, den cual Mesa lo vence cu 44% contra 39% pa Morales, segun agencia noticiero AFP.
Segun constitucion Boliviano, un candidato por gana presidencia den prome vuelta si e obtene 50% mas un di e votonan valido, o logra 40% cu un bentaha di 10 punto di diferencia riba e siguiente candidato.
Ainda e parti cu ta indeciso ta halto, 26%, cu ta inclui esnan cu no a defini nan voto ainda (15%) y esnan cu no lo vota pa ningun candidato o ta opta pa vota blanco (11%).
Na tercer lugar ta posiciona e opositor Oscar Ortiz cu 9%. Un sorpresa tabata e candidato pa Partido Democrata Cristiano (PDC), Chi Hyun Chung, di origen Koreano, ken den apenas un luna a logra 3% di apoyo, cu declaracionnan fuerte contra comunidad LGBT y tradicionnan indigena ancestral.
Oposicion a cuestiona candidatura di Morales despues cu un referendum na februari 2016 a rechasa su postulacion, Sin embargo, na november 2017 Tribunal Constitucional a declara cu e por postula, siendo esey un derecho humano di e presidente.
