Presidente di Bolivia, Evo Morales, a anuncia ayera cu a dicidi di haci un ‘pausa ecologico’ den areanan afecta pa e candelanan na Chiquitania Boliviano, den oost di e pais aki.
“Mi a dicidi di haci un pausa ecologico na e zona di Chiquitania, na luganan afecta. Kico esaki ta nifica? Ta prohibi e benta di tereno”, Morales a bisa na e medionan di e localidad di Robore, na region oriental di Santa Cruz, unda ta funciona e centro di operacion pa coordina e accion contra candela.
E mandatario Boliviano a yega den e jornada aki te na Robore pa ricibi un reporte actualisa riba e candela y despues yega na Rio Negro, cerca di e frontera entre Bolivia, Paraguay y Brasil, unda e candela ta sigui.
Segun Morales, e dianan ‘mas dificil tabata entre 17 y 18 di augustus’ ora a reporta te 8.000 punto di candela, mientras cu awor ta registra 1.100.
E Presidente a reporta cu te na e momento ey, a descarga dos miyon di liter di awa den e zonanan afecta den operacion di avion cu awa SuperTanker cu a ser contrata pa e Gobierno Boliviano y otro aeronave como helicopter y avioneta.
Di loke ta trata e ayudo internacional, te awor nan a ricibi 300.000 dollar di Banco di Desaroyo di Latino America-CAF, 200.000 di Banco Inter Americano di Desaroyo (BID) y otro 150.000 di e Organisacion di Nacionnan Uni (ONU), el a informa.
