(EFE) – Fiscal General di Bolivia, Juan Lanchipa, a informa ayera dialuna cu el a cita e ex-presidente y lider di e partido na mando, Evo Morales (2006-2019), pa duna un declaracion riba un caso di supuesto “traficacion di menor di edad” y “abuso sexual”, cu mester tuma luga diahuebs awor den e region di Tarija.

“E citacion di e tres persona acusa den e caso aki, entre nan Sr. Evo Morales, y e mayornan di e (supuesto) victima a ser yama pa diahuebs dia 10 di october bin na fiscalia departamental di Tarija,” Lanchipa a indica den declaracionnan pa medionan local.

Morales tambe ta acusa pa minister di Hustisia, Cesar Siles, di ta envolvi den un investigacion pa e posibel “violacion” di un menor di edad, cu ken e lo tabatin un yiu y di a crea un red di hobennan entre 14 y 15 aña aña di edad pa tin na su disposicion durante su presidencia, cu el a yama “Generacion Evo.”

E denuncia na cual Siles ta referi tambe ta bisa cu e mayornan di e supuesto victima a “probecha” di e situacion door di entrega nan yiu muhe na e ex-mandatario a cambio di fabornan.

Diahuebs di siman pasa, fiscal departamental di Tarija, Sandra Gutiérrez, a sorprende e pais cu e denuncia cu el a ser kita for di su funcion pa motibo cu e tabata kier ehecuta un orden di aresto contra Evo Morales y a revela e caso di “trafico di hende” cu ta encera su persona.

Pero e orden di detencion contra e ex-mandatario a keda suspendi pa un hues di Santa Cruz.

Sin embargo, un hues a ordena pa reinstala Gutiérrez den su funcion y Lanchipa a confirma e dia aki cu fiscal Gutiérrez a recupera su funcion.

Di su banda, Morales ta afirma cu e acusacionnan ta parti di un “persecucion politico” contra di dje pa evita cu e por presenta como candidato presidencial den eleccion di 2025.

Grupo di Puebla, un foro politico y academico cu ta consisti di representantenan di iskierda político Latino Americano, a expresa su preocupacion tocante e supuesto “campaña di ley” debi na e caso habri contra di e ex-presidente boliviano.

“A pesar di tur e esfuerso di mediacion realisa pa un grupo di colega di Grupo di Puebla entre ex-presidente Evo Morales y presidente Luis Arce, nan diferencianan legitimo awor ta parce di ta traspasa pa e cortenan hudicial,” e Grupo di Puebla a bisa den un declaracion.

“Mescos cu Lula y Cristina (Fernández), nan lo busca pa prohibi nos partisipacion den e siguiente procesonan electoral pa habri caminda pa gobiernonan di derecha. Mescos cu ruman Rafael Correa, e accion aki ta bin di traicion”, Morales a remarca.

E investigacion y acusacionnan ta surgi memey di un bataya largo entre Morales y presidente Luis Arce pa control di Movimento al Socialismo (MAS) y Ehecutivo Boliviano.

E keho pa traficacion di hende a keda presenta dia 26 di september, tres dia despues cu Evo Morales, despues di un marcha di 187 kilometer door di e altiplano di Bolivia, a duna Arce un ultimatum, bisando cu “si e kier sigui goberna” e mester retira su ministernan, na un accion cu Gobierno a califica como un intento di “golpe di estado.”