Bolivia: Evo Morales a bisa cu e ta bay ta candidato “por las buenas of por las malas”

(DW) – Ex-presidente di Bolivia y lider di e oficialista Movimiento al Socialismo (MAS), Evo Morales, diasabra ultimo a sigura cu e ta bay ta candidato presidencial di su partido pa eleccion di 2025 “por las buenas of por las malas,” durante un mensahe na su siguidonan na region di Cochabamba, e cual ta dun’e apoyo politico y sindical.

Morales –ken tabata presidente entre 2006 y 2019- a bisa cu e ta habilita pa ta candidato, aunke Tribunal Constitucional Plurinacional Boliviano na 2023 a dicta, cu eleccion indefini “no ta un derecho humano.” E sentencia ta indica cu un persona por ta presidente di un pais pa dos periodo so, sea di forma continuo of no. E ex-mandatario a goberna tres periodo: for di 2006-2010, for 2010-2014 y for di 2014-2019.

“Te na e momentonan aki, nos ta habilita pa ta presidente legal y constitucionalmente, esey no ta e debate. Loke nan ta haciendo ta pa wak con esnan auto proroga ta busca pa elimina y con ta bay inhabilita mi. Esey ta e pelea y nan no por,” Morales a afirma.

E ex-presidente tambe a sigura cu ta conta cu apoyo y “ta defendi” pa gobiernonan di iskierda di Latino America y a señala su aliadonan, e presidente Luiz Inacio Lula da Silva di Brazil, y Nicolas Maduro, di Venezuela. Asina mes, el a agrega cu si nan no kier habilit’e como candidato esey ta bay ta “a las buenas of a las malas” y cu e lo logra esey cu “mobilisacionnan.”

Sectornan social vincula cu e ex-hefe di Estado a reuni pa tuma medidanan contra di congreso di MAS –cu tin impulso di Gobierno di Luis Arce- y a tuma luga na ciudad di El Alto hasta ayera diadomingo. Morales a haci un yamada na su siguidonan pa “mobilisa” contra di e congreso aki y a ordena nan “prepara pa sali riba caya.”

E bloki cu ta apoya Morales a convoca nan mesun congreso di e partido gobernante pa 10 di juli na poblacion di Villa Tunari, na Cochabamba.

E mandatario actual y Morales ta distancia for di 2021 y na 2023, su diferencianan a bira mas profundo pa e realisacion di un congreso nacional di e partido den cual Arce tabata ausente y na unda Morales a wordo ratifica como lider di MAS ya wordo nombra “candidato unico” pa eleccion di 2025. E presidente no a asisti na e encuentro ey ora a considera cu organisacionnan social, base di MAS, no tabata representa debidamente.

E tensionnan a aumenta despues cu Tribunal Supremo Electoral a dicidi anula e congreso di 2023 y instrui pa convoca un congreso nobo, algo cu tampoco ambos banda oficialista a logra di acorda.