Diahuebs ultimo Bolivia a ricibi e prome lote di 20.000 dosis di vacuna Rusiano Sputnik V cu lo sirbi pa inmunisa primeramente e personal di salud cu ta enfrenta e pandemia na prome linea.
E carga a yega na Aeropuerto Internacional di El Alto, cu tambe e ciudad bisiña di La Paz ta comparti, den e transporte di un aeronave di compania estatal Boliviano di Aviacion for di Argentina.
Un cargamento mayor cu tambe a inclui mas di 20.000 dosis pa Argentina a sali diaranson ultimo cu e vacunanan pa Bolivia di e Aeropuerto Internacional Sheremetievo di Moscu, den un aeronave cu number Argentino cu a yega na Buenos Aires como su prome destino.
E presidente di e pais Luis Arce a ricibi di e prome dosis hunto cu otro ministernan di Estado y cu representantenan di organisacionnan social, mientras cu e transporte y distribucion di e prome dosis aki ta bou di Ministerio di Obra Publico.
E cartera aki tin e mision di protege e “cadena di friu” y di “suministro”, ya cu mester reparti progresivamente den varios region cu a wordo afecta mas pa e pandemia como departamento di Santa Cruz, La Paz y Cochabamba.
E prome 20.000 dosis lo yega “na e sector cu mas ta exponi den e linea di contagio” e vocero presidencial, Jorge Richter a bisa den un contacto corto cu medionan.
“Dosis di Speransa”, ta e frase cu e autonan di transporte di e prome dosis a exhibi y cu segun protocolnan no mester surpasa 10 kilometer pa ora te lo yega na centronan di salud pa su aplicacion.
E dosis cu Bolivia ta ricibi den ocasion aki ta supera e 6.000 cu lo a mester ricibi prome, algo cu presidente Arce a califica como un “bon noticia” pa e pais.
Bolivia ta e di dos pais di Sur America, despues di Argentina, cu ta ricibi e vacuna Rusiano, despues di e contract cu e pais a firma na final di aña pasa pa ricibi 5.2 miyon dosis cu lo yega entre luna di maart, april y mey.
