Departamento di impuesto a haci un yamada na e propietarionan di un propiedad of cas cu nunca a ricibi un cobransa y tampoco a yega di paga grondbelasting, pa acerca na e departamento aki.

Vocero di departamento di impuesto, Meverly Romano, a bisa cu riba nan website tin e formulario pa cliente of contribuyente registra su propiedad. Actualmente nan website ta bou construccion keto bay, y alrededor di 1 juli nan lo bin cu un cambio riba nan website completo. E persona cu nunca a registra nan propiedad y nunca a yega di paga grondbelasting, e ta haya chens durante e aña aki di transicion pa bin registra su propiedad su mes, te cu fin di december. Si esaki no ta sosode, sigur pa otro aña lo manda un cobransa cu boet pa esun cu no a registra su mes pa grondbelasting.

Termino y areglo di pago
Tin un termino di pago cu e ley di grondbelasting ta duna, y cu ta aparece riba e cobransa. Pero semper departamento di impuesto ta brinda e oportunidad pa bin cu areglo di pago. Segun Romano, e posibilidad aki no ta uno nobo, sino cu semper tabata posibel.

E ta remarca cu esun cu lo cay dificil pa paga na tempo y no bin cu un areglo di pago na tempo, si departamento di belasting ta mira cu e pago no a wordo haci na tempo, y e contribuyente no a haci nada, e sistema ta cuminsa procesa un recordatorio of aangifte cu ta bay costa e contribuyente 10 florin. Pero tambe ta wordo duna cierto dia definitivo pa cumpli cu e 50% di e pago, y gradualmente e ta bira mas severo, te hasta pone ordo di retencion riba salario di un persona. Nan ta instrumento cu ley ta podera e departamento aki pa obliga e cliente pa paga su belasting. “Si e contribuyente no actua aworaki, e proceso ey ta bay start,” segun Romano.

Pa evita tur e situacion aki cu por resulta desagradabel, si un contribuyente cu por mira for di awor cu no por cumpli cu e pago di belasting, manera e termino di ley ta indica, por acerca e departamento aki na tempo pa bin cu un areglo di pago pa luna. E por haya mas espacio financiero cu no lo cay pisa pa su cartera, y tambe cu e por cumpli cu e compromiso di belasting aki. Nan intencion no ta di pone boet of beslag, tampoco pa negoshinan cera, pero departamento aki kier bay di un pago obligatorio pa un pago boluntario caminda nan cliente ta asumi nan responsabilidad.

50% di pago
Na final di juni e contribuyente di grondbelasting mester paga 50% di su cobransa. Como dia 30 di juni ta cay den weekend, e fecha limite ta cay pa e siguiente dia di trabou, cu ta bira dialuna 1 di juli.

Eynan nan ta haya e documentonan cu e departamento aki ta exigi, entre nan un taxatierapport no mas bieu cu tres aña, si ta posibel un copia di nan seguro di candela di nan propiedad cu por duna un indicacion di e balor di e propiedad. Of cualkier otro documentonan cu por yuda e inspector di belasting pa por yega na un balor realistico y precies, pa no cobra grondbelasting di mas tampoco. Tur e documentonan aki ta yuda sin tin mester di haci un calculacion riba e balor di e propiedad cu por cay halto y cu ta nifica mas pago riba nan tarifa di grondbelasting.