Aña 2020 a inicia cu basta desaroyo na caminda pa departamento di Impuesto. Entre nan e asunto di pago di impuesto di vehiculo di motor, cu e aña aki mester wordo paga no mas tarda cu dia 31 di januari awor.

Nan a informa cu si bo no lo paga ya sea mita aña of full aña prome cu e fecha aki, bo lo haya un boet di 50% di e balor of suma cu bo mester paga di belasting.

Ya caba vocero di e departamento aki, Meverlyn Romano a anuncia cu e aña aki e fecha di pago no lo wordo prolonga of haci extension pa mas laat. Igualmente e cifra of tarifa no a conoce cambio pa 2020. Pero si e cifra ta cambia riba e tipo di combustibel cu e vehiculo ta uza. “E pago di e belasting mester drenta no mas laat cu dia 31 di januari,” Romano a bisa.

Otorgamento di plachi.
E color di e plachi pa e aña 2020 ta fondo blanco cu letter of cifra cora. Pa motibo ‘logistico’ ainda e plachi aki no ta cla y no ta wordo entrega na e clientenan te luna di maart proximo.

Nan a argumenta cu e partimento di plachi pa fin di aña logisticamente tabata un peso hopi grandi pa e departamento aki. P’esey e biaha aki nan a scoge pa lag’e tuma luga un poco mas laat. Ademas nan ta bezig cu otro strategia pa loke ta e partimento di plachinan. Un ta ariba afspraak y dos, nan ta den combersacion cu un compania pa bay haci entrega di e plachinan pa e cliente, si e cliente ta dispuesto pa paga un suma pa e servicio aki.

Romano a bisa cu e plachi ta na caminda y denter di poco nan lo ricibi nan pa cuminsa distribui nan den e luna indica ariba. Esun cu si ta disponibel dos dia despues cu bo ta paga bo belasting, ta e number di auto personalisa of plachi di nomber. Solamente na momento cu nan ta otorga e plachi, nan ta controla e seguro di auto.

Tambe el a indica cu e plachinan y e pagamento di belasting ta algo separa for di otro. E ley mes ta bisa cu e deadline pa paga e belasting aki ta dia 31 di januari. Nan ta desconseha e clientenan cu kier haci e pago aki na luna di maart, ora cu e plachinan ta wordo otorga. Si nan ta haci despues di e fecha cu e ley ta stipula, ya ta confronta un boet di un 50%, ya cu den nan sistema di belasting e ta hinca caba

A base di cuestionamento di Bon Dia Aruba, e departamento aki ta bay delibera cu e minister concerni pa wak si gobierno por considera pa entrega gratis e plachi pa esunnan cu a paga via banco, y cu ya caba mester a bay busca un recibo oficial di belasting cerca nan.

Esunnan cu ta opta pa paga e prome mita prome cu dia 31 di januari, e otro mita bo mester haci’e prome cu dia 31 di juni proximo. Pa loke ta e pago di impuesto pa truck, mester wordo paga den un solo biaha. Pero nan ta continua cu e maneho flexibel di gobierno, caminda ta permiti pa e automobilista of doño di e truck por haci e pago den dos biaha pa aña. Nan tin e chens di scoge di paga e prome mita di aña aworaki, of nan ta paga full aña di biaha no mas laat cu 31 di januari.

Forma di pago.
Pa evita congestionamento di clientenan den nan proceso di pago tin e opcion di paga na departamento di Impuesto mes y tambe na nan sucursalnan den e diferente MFA. Tambe via banco, cu ta e forma cu nan ta recomenda y mas preferibel via online banking. Pero no lubida cu bo mester haya ainda e recibo for di departamento di impuesto ora bo ta paga via banco.

Nan ta recomenda dos banco den particular, esta Aruba Bank y Banco di Caribe, ya cu nan tin un bon comunicacion pa medio di nan sistema digital y nan data nan ta bon sincronisa cu ta facilita e proceso aki.

Si haci e pago den otro banconan e cliente mester warda 5 dia di trabou prome cu departamento di belasting lo por procesa nan pago. Y despues di esey, e cliente mester pasa na departamento di Impuesto pa busca su recibo original. Nan por busca e tipo di recibo aki na e oficina anexo di nan sede principal na Camacuri, unda normalmente bo ta busca e plachi di auto.

Romano a aclaria cu absolutamente e comprobante di pago di banco no ta esun permisibel pa core den bo auto, sino esun original di departamento di Impuesto. Pasobra esun di banco no ta demostra dilanti polis cu e automobilista ta na ordo cu nan pago di belasting di añanan atrasa.