Facebook ta obliga di paga un boet di 5 biyon dollar pa violacionnan di privacidad, alabes e compania gigante lo ta suheto di control hopi mas estricto, pero investigacionnan andando tanto na Merca como na Europa lo por crea dolor di cabes adicional pa e compania.
E boet di FTC ta ‘by a long shot’ esun mas halto cu e agencia federal a yega di impone riba un compania di tecnologia. E entendimento ta bin cu restriccionnan y vigilancia gubernamental.
Pa mas cu un decada Facebook tabata confia pa djis regula su mes y mantene su 2.4 biyon usuarionan nan interes na pecho. Djey Rusia a mete den e ultimo eleccionnan Mericano, ‘fake news’ y e scandal di Cambridge Analytica, den cual un compania di coleccion di data cu metanan politico afilia cu e campaña presidencial di Donald Trump a mete man den informacion personal di 87 miyon usuario.
Organonan di regulacion Europeo y Mericano tuma nota. Facebook actualmente ta para dilanti, no solamente di un boet biyonario, pero tambe restriccionnan nobo. Asina por mira cu e siguiente institutonan tin investigacionnan andando contra Facebook: U.S. Securities and Exchange Commission, U.S. Justice Department, U.S. Federal Trade Commission, Irish Data Protection Commission, U.S. Housing and Urban Development, Hefe di Privacidad di Canada, Reino Uni, Belgica, Alemania y Procuradornan General di Estadonan Mericano y Procurador General di Merca.
