Federacion Brasileño di futbol a duna un boet di 28.500 Euro na Chapecoense cu a perde casi tur su hungadornan den un accidente di avion na Colombia dia 28 di november pasa. Den e accidente 22 hungador a muri, hunto cu nan entrenador y personal tecnico.
Chapecoense mester a hunga contra Atletico Mineiro den ultimo dia di competencia di liga di Brasil. Den esaki no tabatin nada importante den wega, y tabata sa cu no tabata posibel pa e wega tuma lugar, pero autoridadnan di e federacion a dicidi di continua cu e protocol. E arbitro cu tabata asigna pa dirigi e wega aki, a warda durante 30 minuut segun protocol y ora cu nan tabata sa cu ningun di e dos ekiponan tabata presente riba cancha, nan a suspende e wega y a informa e federacion tocante e situacion.
E dos ekiponan a haya un boet di 28 mil 500 euro. E castigo no ta ehecuta ainda, pa tal motibo nan ta spera riba un posibel rectificacion di banda di autoridadnan den proximo oranan, pasobra mester considera e situacion di e ekipo Chapecoense, cu a perde casi tur su hungadornan.
