Boeing ta trahando pa drecha un problema recien descubri cu e software di e 737 Max, agregando na e lista di tarea cu a fabricante di avion ta enfrenta pa pone e avion bek den aire.
Boeing a bisa den weekend cu a informa Administracion Federal di Aviacion Mericano (FAA) di e problema.
“Nos ta realisando e actualisacionnan necesario y trahando cu FAA pa entrega e cambio aki, y teniendo nos clientenan y proveedonan informa”, Boeing a bisa den un declaracion. “Nos prioridad mas halto ta sigura cu 737 Max ta sigur y ta cumpli cu tur rekisito regulatorio prome cu e bolbe den servicio.”
Un persona cu conocemento di e situacion a bisa cu e problema ta relaciona cu software cu ta verifica si e monitornan controlando sistemanan clave den e avion ta trahando adecuadamente.
E chekeo di monitor supuestamente mester tuma luga automaticamente ora ta cende e avion of e sistema, pero durante un revision reciente, un di e monitornan no a start corectamente, segun e persona, kende a papia den condicion anonimo pa discuti un detaye cu no a ser anuncia publicamente.
A descubri e problema durante un revision tecnico cu normalmente ta tuma luga na fin di e proceso di desaroyo di software, un señal cu Boeing por ta cerca di finalisa cambionan diseña pa pone e avion bek den vuelo.
Boeing ta skirbiendo di nobo e software cu a hunga un rol den accidentenan cinco luna apart na Indonesia y Ethiopia, cu a costa bida di 346 persona y a conduci na reguladonan pa para e avion mundialmente na maart 2019.
Boeing ainda mester termina e pakete di software, conduci un of mas vuelo di demostracion cu expertonan di FAA abordo, y trece pilotonan di aerolinea pa test e cambionan cu ta realisando.
Apart diabierna ultimo, Fitch Ratings a baha e rating di debe di Boeing. A cita insiguridad riba ki tempo e Max lo bula di nobo, e reto di alcansa entreganan cu a stop april ultimo, aumento di debe y riesgonan di boet, demanda y daño na reputacion.
Accionnan di Boeing Co. a cay $7.85, of 2.4%, pa cera na $324.15.
Moody’s Investors Service, cu a baha e rating di Boeing dia 18 di december ultimo, a señala siman pasa cu otro rebaha ta posibel pa motibo di un lucha probablemente largo y costoso pa recupera confiansa, hasta si e Max bolbe den servicio relativamente pronto.
E compania basa na Chicago y su CEO nobo, David Calhoun, ta programa pa reporta resultadonan financiero di cuater kwartaal dia 29 di januari proximo. Algun analista, manera Ken Herbert di Canaccord Genuity, ta spera cu Boeing lo anuncia un cargo substancial nobo contra entrada di e crisis di Max. “Awo ta momento pa e CEO nobo, Calhoun haya mas noticia malo cu ta posibel y provee e compania cu un buffer adicional bayendo den 2020”, Herbert a skirbi den un nota na clientenan.
Boeing a tuma un cargo di $5.6 biyon den segundo kwartaal di aña pasa y a revela biyones mas den produccion di costo mas halto pa motibo di e MAx.
E prohibicion di vuelo a causa cu Boeing a suspende produccion di e avion, a ocasiona investigacion di Departamento di Husticia y Congreso, como tambe demanda legal di e famia di pasaheronan den e dos accident, y a causa cu a despedi ex- CEO, Dennis Muilenburg.
E revelacion di comunicacion interno a daña mas ainda e reputacion di Boeing, revelando cu pilotonan di test y otro empleadonan clave a bati alarma pa siguridad di e Max. Sikiera dos a bisa cu nan no lo pone nan famia riba e avion.
