Boeing ta suspende produccion di 737 Max, mirando cu speransa cu nan avion bolbe bay den aire ta disminuyendo. Ta probabel cu ramificacion extende mas leu di e fabrica di Boeing na Renton, Washington, na sector di aviacion y fabricacion. Hasta por altera e balans comercial di e pais.
Southwest Airlines, cual tabata depende riba e avion Boeing pa actualisa su flota, a rechasa cualkier speransa di bolbe pone e Max den su linea pa cinco siman, te cu april. American Airilines a haci mescos siman pasa.
Southwest a bisa ayera cu a purba pa minimalisa interupcion di biahe y a pidi disculpa na cliente pa cualkier impacto cu nan lo sufri. Boeing a anuncia cu lo suspende e produccion di Max na cuminsamento di januari, sin un fecha specifico ora e planta na Renton lo reanuda.
E compania a bisa cu no lo kita di trabou e 12.000 trahado di e fabrica ‘na e momento aki’, y hopi di nan por manda na otro planta den region di Seattle. Algun tambe por ta asigna pa traha riba e 400 jet cu Boeing a construi for di maart, pero cu no por a entrega.
E decision di Boeing ta un reconocimento cu lo tuma mas tempo di locual e compania ta spera pa e avion lo bolbe bula. Max ta e avion mas importante di Boeing, pero e ta para for di maart, despues di accident na Indonesia y Etiopia den cual un total di 346 persona a perde nan bida.
FAA a bisa e compania siman pasa cu tin expectactiva poco realistico pa pone avion den servicio. Boeing ya a faya varios estimado pa e fecha di regreso di e avion.
E agencia no a duna fecha specifico pa aproba e regreso di Max, pero e administrado di FAA, Stephen Dickson a bisa cu e ta bay riba orario di e agencia, no esun di Boeing.
FAA a bisa cu no lo duna comentario riba decision comercial di Boeing y no tin tempo estableci pa completa e trabou pa bolbe certifica e Max pa bula.
Hasta si no despedi ningun empleado, un paro den produccion toch lo corta den output economico di e pais, pa motibo di e marca grandi den sector di manufactura Mericano. Durante october e aña aki, output di fabrica di sector aeroespacial Mericano a cay 17% compara cu e mesun periodo aña pasa, na $106.4 biyon, en parti pa motibo di reduccion di produccion di 737 Max.
