E prome dia di tratamento di presupuesto a keda caracterisa pa un elemento cu no ta pertenece den e sala, di ningun manera: un tribuna publico bochornoso, cu aparentemente tabatin e idea cu nan ta particip’e den e proceso. Henter dia e situacion aki a dura, a pesar cu na diferente momento presidente di parlamento a duna di conoce cu e situacion aki ta inaceptabel. Pero tabata parce cu e publico, por lo menos un parti, tabata pensa cu e presidente no ta tribi di yega na e medida di desocupa sala. A dura te atardi laat prome cu e prome advertencia a bin, unda e presidente a adverti cu si cos sigui asina, e lo mester a pidi cuerpo policial pa desocupa tribuna, y den e proximo dianan sigui asina tambe. Cos a calma pa un rato, pero henter anochi e bochincha a continua.

Nos a spera un intervencion mas fuerte di su banda, dunando e publico di conoce cu nan no ta particip’e den loke ta sosodiendo den e sala, y cu nan no tin derecho den e sala ey, solamente ta permiti nan ta presente, asina leu cu nan ta comporta mes manera mester ta. Mester bisa di otro banda cu varios orador, tanto ministro como parlamentario, tabata actua di tal manera cu mester interpreta esey como purba haya reaccion di e publico, y anto no ta nada straño cu e publico ta reacciona. Si ta brinda un show di bochincha, parecido na un gayero, o circo, anto no ta straño cu e publico ta kere cu ta esey nan ta presencia.

En todo caso, e dia pa un gran parti a bay na e wega di critica y acusacion di ambos banda, na elaboracion di posicion politico cu den e ultimo lunanan a haya amplio cobertura caba den tur medio local. Loke tabata parce di ta bin na di dos luga, ta e presupuesto mes.

Mester bisa si cu e intervencion di ministro encarga cu husticia, a sobresali pa su contestanan al caso, splicando ampliamente e puntonan discuti, desplegando un conocemento detaya. Asina ta un placer, hasta si bo no ta di acuerdo cu ne riba tur asunto, pa tuma nota di su splicacion. Naturalmente cerca ningun mandatario lo haci falta bon intencion, pero den practica cos por resulta mas dificil cu loke e ta parce a primera bista. Un di e puntonan discuti tabata e cortamento den presupuesto di overtime pa polis, cu un tercera parti, cu ta mustra algo cu mas den aña en berdad por resulta optimista, sigur si ta dura cierto tempo pa recluta personal nobo.

Dentro di e diferente asuntonan cu el a trata den prome tanda di contestacion, el a ilustra entre otro e situacion deplorabel di maneho di admision y integracion, cu actualmente ta rekeri bastante adaptacion. El a indica por ehemplo e entrada di hende di cierto edad caba, cu despues di yega na edad di pension mester sobrevivi riba un pago di AOV di un par di cien florin; no solamente un problema pa ministro di husticia, sino pa nos comunidad, algo cu na varios oportunidad nos a trece dilanti den e editorial aki. El a ilustra bon con pa añanan largo no tabatin otro criterio pa admision di stranhero cu e ‘Accoord, conform… di su antecesor responsabel pa admision y integracion, cu nunca a formula un maneho, y hasta a (gaña) lubida cu e maneho di admision tin consecuencia pa naturalisacion, es decir pa maneho na nivel di reino. Straño ta keda cu ta e ex colega responsabel pa labor so a haya problema cu husticia pa su ontheffingnan, pero esun cu tabata influencia e otorgamento di permiso directamente no.

Di tur manera, e medionan disponibel pa husticia ta keda limita. A dirigi mas medio pa instancia manera Orthopedagogisch Centrum y Voogdijraad, como parti di e plan di rescate social, pero en total presupuesto di husticia no ta haya mas recurso, casi un miyon menos compara cu presupuesto 2017, mientras cu cuerpo policial ta haya mas di 2 miyon menos compara cu 2107, loke ta logico mirando cu ta tempo di crisis.

Den intervencion di ministro encarga cu labor y asunto social, el a trata e asunto di e alocacion grandi di recurso pa atende e problema urgente social di desatencion y abuso di mucha, y e situacion familiar corespondiente. Esaki a bira e punto di lansa pa gobierno ataca e problema social urgente, pa cual a pone un suma substancial riba presupuesto di asunto social. Loke ta keda e interogante ta con e implementacion ta bay tuma luga, y con ta duna bon uzo na e recursonan extra poni disponibel.

Realmente nos no ta impresiona cu loke nos a mira na trabao haci, of por ta cu no a divulga esaki. E motibo ta cu tin hopi cos cu no ta costa placa, y esey na prome luga ta simplemente sinta hunto y cuminsa coordina cos. Ta bunita pa e asunto di un medico di confiansa (vertrouwensarts) bin dilanti via parlamento, pero esey y otro asunto manera divulga unda un victima actualmente mester acudi, no ta asunto cu ta trece gasto grandi y no mester warda. Diligencia no ta costa tanto.