Awe ta e dia cu ta bay dicidi rumbo di nos pais den e proximo cuatro aña. Awe cada un di nos ta haci un tiki di diferencia, sea loke sea cu nos vota. Vota consciente, ta un conseho cu nos ta tende hopi, y ta un bon recomendacion, riba su mes. Pero, mester haci e pregunta tambe: consciente encuanto kico? Consciente cu bo ta cumpliendo cu deseo di mayoria di bo famia cu bo ta sigui loke pa decadanan ta haci, independiente di bon o mal noticia cu por tin for di seno di nan partido faborito, tradicionalmente? Consciente cu bo por bay tur fiesta di famia e proximo cuatro aña sin cu e asunto termina na bringamento, pio ora bebida tuma control di curpa? Consciente pasobra bo ta sinti cu bo a cumpli, pasobra bo sobrina a caba di haya trabao na gobierno, y bo no kier ta e party pooper di e famia?
O, consciente pasobra bo a analisa pa bo mes, kico esunnan den poder durante e ultimo ocho aña a haci bon o malo, y yega na un balansa cu ta bay banda positivo o negativo? Consciente cu bo ta pone den e balansa bo deseonan personal, kico abo a logra den e añanan aki, o bo ta mira e cos mas amplio, tumando na cuenta e cosnan cu lo mester a haci pa e pais den su totalidad bay dilanti? Consciente talbes, pasobra bo a pone tambe den balansa loke oposicion a haci den tur e añanan ey, bo tabata satisfecho cu e critica, eventualmente constructivo, cu nan a trece dilanti, pasobra oposicion lo mester ta e prome watchdog pa cualkier gobierno? Y tambe loke awor den campaña nan a trece dilanti como mehoracion cu nan ta propone, si acaso nan bay forma parti di e proximo gobierno?
Nos por bisa cu nos no a keda completamente satisfecho, ni cu loke gobierno ta propone, ni cu loke oposicion ta trece como proposicion. Pero naturalmente esey ta e posicion como medio di comunicacion, no como punto di bista individual di cada miembro di redaccion. Laga nos ilustra riba ki aspecto nos a spera un contesta mas cla, di tur banda. Por ehemplo, e hecho cu ya ningun hende ta papia mas di e ley riba financiamento di partido politico, cu realmente mester tabata introduci y implementa caba, pa por ta efectivo durante e eleccion aki. Esey no a sucede y esunnan cu tin beneficio cu e ley no t’ey, acumulando nan sumanan grandi di campaña cerca e comerciantenan cu ta spera di cobra nan inversion den e proximo añanan, ta contento cu nan por a campaña trankilamente, sin preocupacion cu nan mester duna cuenta. Mirando esaki, nos no tin ningun ilusion cu den e proximo cuatro aña e asunto aki ta keda regla, ken cu gana eleccion. Tampoco cu ta bin mas transparencia den e manera di opera di gobernacion. E ciudadano cu desea mas informacion, riba cual e tin derecho, lo keda pega den e barera invisibel cu tin, sin cu sa ta ken a pone, y ken ta cuid’e.
Nos por mira cambionan marginal den enseñansa, salubridad publico, siguridad, situacion financiero, exceso di personal di gobierno, etc. Tur esey no ta haci un diferencia dramatico pa vota pa tal o cual partido. Pero nos ta kere cu si tin un aspecto cu ta resalta cu ta haci e diferencia. Y esey ta e aspecto moral di e cosnan mahos cu a cuminsa sali na luz di dia den curso di e aña aki, y cu ta tira un luz sumamente negativo riba e manera di opera di e actual gobierno. Y den e sentido aki, aunke nos ta purba mantene obhetividad pa loke ta e echonan, nos mester haci un escogencia, pero no un escogencia pa tal o cual partido, pero si pro o contra moral y etica.
Desde luna di maart di e aña aki nos tur ta testigo di e descubrimento di e delincuencia grandi den seno di gobernacion, cu a laga comunidad boca habri. Hopi ciudadano a bisa loke nan ta pensa di e grado di delincuencia den seno di esunnan cu ta e prome nan yama pa defende y protege moral, norma y etica den e comunidad aki. Y kico nos a mira? Cu practicamente henter e top di e partido na mando a cera fila, y ta defende cu pasion lo indefendibel, y ta nenga redondamente di reconoce cu tin algo hopi malo ta tumando luga den nan seno, cu corupcion organisa di tal manera y te tal grado, cu nunca nos a yega di experimenta, di ningun gobierno anterior, ni geel ni berde. Esey ta loke ta e cos mas preocupante na e momento aki: con nos ta bay coregi e cosnan aki, despues cu husticia di Aruba y/o Hulanda caba di haci nan trabao. Ta tempo pa nos realisa cu nos mester pone un stop, prome cu tur otro cos, na e corupcion impordonabel, unda esunnan cu ta perpetra e delitonan aki, ta casi orguyoso, y den nos cara, di loke nan a y ta haci. Esey por cuminsa cambia: bo voto secreto y sagrado por ta bo aporte.
