Tur siman nos ta publica e resultadonan di un poll riba un ponencia hunto cu un splicacion neutral di e topico.
Investigacion cientifico durante varios decada ta comproba cu e uzo excesivo di sucu ta haci hopi daño na salud humano en general. Ta importante si pa comprende bon kico sucu ta y kico e ta haci den curpa di un hende. Sucu ta un substancia natural, cu pa miles di aña caba e ser humano a logra produci na forma masal pa uza pa amplia su dieta. Nos curpa mes ta uza sucu y otro cuminda manera producto di hariña y hasta vet, cu e mes ta transforma den sucu, pa entrega como energia na henter nos sistema corporal. Basicamente, sucu ta e combustibel cu nos curpa ta uza pa funciona.
‘So far, so good’, nos por bisa anto. Di berdad nos niun a yega di mira un blenchi cu sobrepeso, mientras un gran parti di su dieta ta consisti di sucu. Ta unda e problema ta surgi anto? E problema ta bin ora nos ta adopta un estilo di bida di sinta hopi y haci poco (ehercicio fisico), cu ta haci cu nos curpa ta acumula demasiado sucu. Y kico e ta haci cu esey? E ta crea reserva den forma di vet na diferente parti di nos curpa. No solamente bao di nos cuero, na brasa, pia, bariga, pero tambe rond di cierto organo, loke ta stroba nan bon funcionamento. Tambe e ta aumenta e problema di vet den adernan y na curason, contribuyendo grandemente na problema cardiaco, cu ta un di e causanan principal di morto. Na otro pais ya a surgi e idea di combati e uzo excesivo di sucu, traves di haci e producto aki mas caro. Esey por haci’e por ehemplo via aumento di impuesto di importacion. Si esey ta mas factibel pasobra e ta algo cu ta importa, manera den nos caso.
Otro pais cu ta produci sucu por implementa otro tipo di cobra extra riba e producto. E producto mas caro lo mester stimula hende pa cambia pa otro bebida cu ta haci menos daño. Y por tin como meta tambe pa educa nos yiunan di otro manera, y no custumbra nan desde chikito di consumi bebida cu un contenido halto di sucu, manera soft drink, di forma excesivo. Ta importante señala si cu sucu no ta e unico producto cu por considera pa yuda nos hendenan bira mas consciente. Kico ta pensa di vet (res) di porco cu te awe ainda ta wordo uza pa traha cuminda y pan? Kico ta bo opinion, haci sucu mas caro via impuesto of no?
