Hefe suplente na Gele Koorts en Muskieten Bestrijding (GKMB) Clayton Croes ta adverti cu bo ta haya multa ora bo tin mas cu 50 criadero di sangura na bo cas.

“Dunamento di multa no ta sosode hopi. Nos no kier mishi cu cartera di ningun hende pero nos ta duna advertencia si topa cu criadero.” E doño di cas ta keda cu e advertencia cu ta specifica kico a wordo haya, kico a wordo haci anto kico e mester haci despues. GKMB ta keda cu un copia di e advertencia aki como prueba cu esaki a wordo duna y despues esaki ta wordo teni aden en espera pa un siguiente inspeccion. Dependiendo di e gravedad of si ta temporada di yobida, despues di e advertencia bo ta bolbe haya un otro bishita di GKMB un par di siman of luna despues. Esaki ta un registro cu por wordo uza pa e di dos biaha anto manera cu bo tin un di dos advertencia segun sr. Croes: “Bo tin e ora e posibilidad cu semper bo por bay busca un ‘Buitengewoon Agent’ (BOA) pa haci e procedura di duna multa. Den pasado el a wordo haci regularmente awo no mesun hopi pero semper cu e idea pues cu e ta wordo duna den casonan extremo cu ta surpasa 50 criadero. Cual no ta pasa hopi. 50 criadero ta un cifra hopi grandi pues e ta sosode relativamente poco.” Recientemente a cay hopi awa na Aruba cual kiermen mas criadero anto GKMB ta atendiendo cu esaki.

Trabao di GKMB

Segun  Sr. Croes, GKMB tin diferente yamada ainda cu nan ta trahando riba dje cu a wordo cancela of luganan cu no a logra pasa aña pasa. Tin gruponan cu ta sali parti mainta y parti merdia pa haci bishita na cas y trata cu tur loke tin di haber cu casnan sospechoso y di yamada. Si por ehempel a yama parti mainta, esun di merdia por atende of hopi biaha e siguiente dia. Ora di yama, GKMB ta pidi un formulario standard cu tur trahado tin den e oficina di kehonan ricibi. Ta skirbi e nomber, fecha, number di telefon y un descripcion di e keho. E yamadanan ta wordo colecta anto e trabao ta wordo parti door di e supervisor.

“Hopi biaha un bisiña ta yama pa culpa e otro y nan no kier duna informacion anto esey no ta e manera di traha. Semper mester tin un persona responsabel cu a yama y duna e keho. Naturalmente nos no ta bisa ken a yama pero esaki mester wordo registra pa wordo atendi debidamente.”

GKMB ta keda cu casonan pega cu nan formularionan no por wordo uza den sentido cu nan no sa ken ta e persona cu nan mester atende.  “Ningun hende kier wordo mira manera e bisiña fastioso. Nos ta atende nan pero e ta keda un situacion cu nos ta bay, bin bek, anto den 2 luna atrobe e mesun situacion ta keda pasobra ningun hende ta tuma responsabilidad.”  Sr. Croes ta splica cu nan ta gusta duna e persona un tiki mas responsabilidad tambe pa sa kico pa haci si en berdad topa cu un criadero. “Si bo ta biba banda di un cas bandona anto ta ripara cu tin un bari, e ta un tiki jammer cu bo tin cu yama GKMB pa wak den bisiña di cas bandona siendo cu bo mes por haci hopi pa yuda preveni criadero.” E number di telefon pa yama ora kier entrega keho riba criadero ta 585-5533.