Bo ta di edad y cu cas grandi pa mantene? Mas y mas ciudadano cu e preocupacion aki…

Goberna significa wak dilanti. Esey ta conta tambe pa asunto manera e grupo grandi di hende di edad halto cu dentro di poco ta forma casi 25% di nos poblacion. Esaki ta obliga nos pensa riba e consecuencia cu e lo tin pa e alternativanan cu nos por tin pa atende diferente aspecto di esaki. Recientemente a toca un di e temanan al caso, durante e conflicto entre ministro encarga cu salubridad publico y e fundacion SABA, cu ta dirigiendo parti grandi di nos facilidadnan pa anciano. Aki ta trata di e escogencia entre crea hopi facilidad intramural, o scoge pa mantene mas tanto posibel e persona di edad den su mes ambiente social y su mes vivienda. En principio e escogencia ta facil, ya cu nos tur ta reconoce e balor di keda den un ambiente conoci pa e persona concerni.

Pero esaki no significa cu nos mester cera wowo pa e problemanan cu ta surgi y cu ta exigi un contesta contundente. Un di nan ta e aspecto di hende di edad avansa cu ta biba ainda den nan cas cu nan a traha o cumpra tanto aña pasa, unda nan a lanta nan yiunan cu naturalmente un dado momento a bay biba riba nan mes. Con tal cu e personanan aki, siendo pareha o talbes nan so, despues di fayecimento di un di nan, ta bibando den un cas cu ta demasiado grandi, eventualmente cu un cura grandi cu tambe mester mantene. Cu un entrada cu a bira menos compara cu tempo nan tabata traha, ta bira dificil pa keda biba asina, aunke e deseo t’ey pa keda. E alternativa no mester ta un cas di anciano, sino otro vivienda cu ta adapta, pa loke ta tamaño y facilidad di mantencion, na e necesidadnan di un persona asina. Pregunta: e tipo di vivienda ey ta disponibel awor? Tin un manera pa yuda un pareha of persona so pa logra e traspaso di su cas grandi pa algo mas facil y mas comodo den ultimo fase di su bida? Nos por a ripara algo caba, cu den gobernacion ta pensando riba e tipo di asunto aki cu lo mester di nos atencion? Y si acaso nos dicidi di bay atende e asunto aki, kico ta e alternativanan cu tin pa haci esaki na un manera efectivo y economicamente viabel?

Hopi pregunta relaciona cu otro, pero ban purba contestanan, irespecto nan haya atencion di banda di gobernacion, pasobra nos no tin pakico warda riba nan. Na prome luga, ta importante purba pensa unda e desaroyo aki mester tuma luga. Den un articulo anterior nos a papia di e fenomeno di nos urbanisacion cu a crece bay pafo, lagando e centronan urbano den mal condicion. Hopi di e viviendanan grandi di cual  nos ta papiando ta den e zona nan mas nobo, leu di e centronan. Aunke cu hopi servicio comercial y den menor grado esunnan publico a sigui e ciudadano ora el a bay biba mas leu, tin hopi servicio concentra ainda den e centronan.

Nos por a mira cu den e ultimo periodo di gobernacion tabatin un esfuerso pa reactiva comercio den centro di Playa, loke ta di aprecia, sin cu necesariamente ta comparti opinion tocante tur aspecto. Loke ta falta ainda, sin embargo, ta con atende  y contraresta e tendencia di cada bes menos hende bibando den centro di ciudad, loke ta crucial pa trece mas bida den centro. Un di e alternativanan cu lo conveni e ciudadano di edad ta si por a yega na proyecto di  vivienda adapta mas cerca o den e centronan urbano, pa e personanan aki pa un situacion mas faborabel, cu servicio comercial y publico mas cerca cas, y limitando o hasta eliminando e necesidad di mantene un auto. Tambe e ora e viviendanan grandi por bin na disposicion di personanan mas hoben cu tin yiu ainda. Esaki no por sin planificacion pa crea un mercado adicional di vivienda.

Mester bisa tambe cu e grupo di edad halto no ta e unico grupo cu por yuda (re)pobla nos centronan di ciudad. Tambe por ehemplo studiante local y di exterior por ta futuro habitante di nos centronan urbano, añadiendo asina na bida cultural y di diversion sano den centro di ciudad. Ta bisto cu e limitacion di e proyecto di drecha Caya Grandi so,  en bes di bin cu un plan general pa re desaroya henter e centro, no a funciona. E asunto di repobla e centro na un manera adecua, cu ademas por brinda oportunidad tambe na desaroyadornan di proyecto di vivienda, a keda for di bista. Nos a keda pega den e pensamento cu e unico manera pa desaroya nos isla den futuro ta sigui crece cu vivienda solitario riba tereno apart cada un, te dia lama bisa nos cu ta te ey nos a yega…

Banda di e temanan di debate usual entre e partidonan cu ta bay participa na proximo eleccion, por ta cu nos mester cuminsa pone e asuntonan aki, na un manera positivo, riba agenda di Aruba…