“The first time we realized we were alive, it was pain that told us.” E prome biaha cu nos a realisa nos ta na bida, ta dolor a bisa nos. Esey ta un frase di Alysia Harris claro. E filosofia cu tur hende den bida kier ta feliz ta zona un poco dudoso pa mi. Mi hendenan, ban papia!
Mi tin un amigo cu mi ta considera un brujo. E ta hari ora mi bis’e, pero e realidad ta cu e bisa mi hopi cos cu ta pone mi cuestiona si den berdad e ta pertenece na e mundo mortal aki. Poco aña pasa, mi tabata pasando den momentonan dificil cu mi curason. Boso mes
sa mi hendenan, cuenta di ta young y in love cu hende robes no ta mucho facil no.
Cuenta di tin 18 aña y kier kita cay muri paso nan a dicidi di stop di stima bo, ta un
drama riba su mes. Pero pa mi suerte, mi a topa mi amigo brujo cu pa simannan
largo a papia cu mi tocante amor y tristesa y pakico tur dos ta bay asina bon hunto.
Mayoria di ocasion mi no tabata ni comprende kico e tabata kier bisa mi. Y awo varios aña despues cu mi ta un tiki mas grandi y mas sabi mi por pone puntje bij paaltje y comprende tur cos.
Un biaha e di cu ser humano solamente ta sinti completamente na bida den dos ocasion
Uno ta ora nan ta den amor y e otro ora nan ta den dolor. Esaki, segun e ta pasobra e
ta e unico dos momentonan den bida ora emocionnan ta intensifica mas di lo comun.
Esaki ta e motibo pakico hende cu a pasa den tanto cos y ta sinti numb, tin ora ta opta
corta nan mes of cosnan similar. Pasobra si nan causa nan mes dolor sikiera nan ta sinti.
Esaki ta dicon tanto hende ta obsesiona cu amor y ta haci cosnan ridiculo pa haya esaki.
Sinti, sinti, sinti, hende kier sinti. E ta humano pa sinti, e ta humano pa kier sinti tambe.
Hopi hende ta kere nan ta buscando felicidad, pero felicidad no ta un destinacion sino algo cu bo ta keda traha riba dje pa hopi largo. Pero dolor y amor ta mas complica pasobra nan ta adictivo, tur dos ta un climax riba nan mes. Tin hende ta bira asina custuma na dolor cu nan no sa ken nan ta ora nan no ta sinti e. Pues como bon adicto nan ta subi caya y bay busca unda dolor a keda. Tin hende ta asina obsesiona cu e idea di amor, cu nan no sa ki pa haci si nan no ta den dje. Wak, esaki no ta un palabra di conseho, ni nada por el estilo. E ta gewoon un pensamento, niun hende ta djis contento tur ora, e no ta realistico y pa e motibo ey e no tin sentido di cana tras di felicidad.
E ta momentaneo. Hende ta un combinacion di emocion. Hende ta cambia cu tempo, pero nada ta cambia nan mes lihe cu amor of dolor.
