Reconociendo nos Arubianonan nobo den cuadro cu celebracion di 18 di maart, nos a combersa cu Jose Lecler, 49, naci na Santiago, Republica Dominicana.
Sr. Lecler ta un park ranger na Parke Nacional Arikok anto tin actualmente 23 aña bibando na Aruba. Despues di algun aña trahando manera security guard na banco, el a haya un otro oportunidad na Parke Nacional, el a conoce un dama, casa y haya su nacionalidad Hulandes.
“Mi a bin cu e meta pa busca un miho bida”, e ta bisa Bon Dia. El a bini via di famia cu tabata residencia akinan caba, anto asina el a cuminsa custumbra cu e cultura manera cu el a yega. “Mesora mi a cuminsa check e historianan di Aruba, e corantnan y cosnan asina.” Sr. Lecler ta bisa cu ya cu e tabata tin famia na Aruba, nan tabata semper bis’e con dushi nan tabata pasando, con chikito y bunita e isla ta anto bon pa traha. “Ya asina mi tabata tin mente na Aruba so prome cu e otro islanan”, e ta bisa.
Idioma y cultura
E diferencia di cultura entre nos isla cu Republica Dominicana no ta mucho grandi. Nos clima ta casi mescos, y nos ta semper conecta den un forma of otro via diferente tipo di cuminda y tradicionnan cu nos ta comparti. Sr. Lecler por papia y compronde Papiamento manera un Arubano mes.
E prome cos cu sr. Lecler a nota ora el a yega, ta con chikito en berdad Aruba ta den comparacion cu Republica Dominicana. Pero tambe e ta bisa, el a ripara con lihe bo por integra den e comunidad si bo ta pone di bo parti. “Di biaha bo por conecta cu diferente tradicion cu tin, tradicionnan di afo y di akinan mes.” E ta bisa cu e dificultad mas grandi pe tabata e decision pa cuminsa siña e idioma. E ta pensa cu nada ta dificil den cualkier pais cu bo ta yega, mas grandi ta pa tuma e iniciativa. “Ora bo tuma e iniciativa tur cos ta bay facil”, e ta expresa.
Sr. Lecler tin cu entre otro guia turistanan den areanan di Parke Nacional anto e ta bisa cu pa siña Ingles mes tabata hopi facil pe. Hulandes ta unda e tin poco dificultad, pero Portugues tambe e ta siñando domina.
Integracion
Na Parke Nacional – unda e tin casi 17 aña trahando – sr. Lecler a haya varios oportunidad pa sigui crece te cu e ta un di e top rangernan envolvi den e proyecto di raton di anochi por ehempel. Ora nos a puntr’e kico ta locual ta inspira mas di su trabao na parke, e ta contesta: ‘E naturalesa’. E ta bisa cu e fauna y historia di Aruba, como tambe e trabao cu e ta haciendo, ta cosnan cu e ta reconoce y aprecia masha hopi. Trabao di e rangers na parke ta encera entre otro pa mantene cual ta un 18% di Aruba mas o menos, protege naturalesa y yuda turistanan siña mas di e cultura y paisahe di nos isla.
Sr. Lecler finalmente ta conseha na cualkier persona cu por tin dificultad pa integra cu e comunidad di Aruba, pa ‘pone di su parti’. Algo cu ta yuda hopi na inicio ta pa bay cierto eventonan cultural anto no tene miedo pa ‘be in the mix’ y envolve bo mes mas cu desaroyonan local, segun e ta bisa. Sr. Lecler ta sinti su mes na cas, e ta sinti agradecido cu Aruba y su meta ta pa sigui duna kico mas e por duna na e isla.
