Esaki ta e temporada pa ta contento, wel pa mayoria di persona. Pa otronan, djis e pensamento di e festividadnan di Pasco ta yena nan cu teror, un fenomeno yama “Bah humbug syndrome” Pero segun estudionan nobo haci, e fenomeno aki por ta ocasiona pa falta di actividad di e parti di e celebro asocia cu e “spirito di Pasco”. Si esaki ta corecto, investigadonan a identifica e parti di e celebro asocia cu spirito di Pasco, un area cu nan ta kere cu ta hunga un rol den e sentimento di alegria y nostalgia cu hopi di nos ta sinti durante di e temporada di Pasco.
E descubrimento detaya den “The BMJ’s”, lo por yuda trece e spirito di Pasco bek cerca personanan cu tin e Bah humbug syndrome, segun e autornan. Pa yega na e resultadonan aki, co autor Anders Hougaard di Universidad di Copenhagen na Dinamarca y coleganan a haci uzo di fMRI (functional magnetic resonance imaging) pa scan e celebro di 20 adulto. E team a nota cu desde inicio di añanan 90, fMRI a wordo uza pa punta na regionnan emocional y funcional di e celebro di e ser humano; den e estudio aki, e team a haci uzo di e tecnica di scan pa determina si sea e spirito di Pasco por wordo isola den un region celebral specifico.
“Rond mundo, nos ta calcula cu tin miyones di hende cu ta mustra un deficiencia den e spirito di Pasco despues di hopi aña celebrando Pasco. Nos ta referi na esaki como e bah humbug syndrome. Localidad specifico di e spirito di Pasco ta e prome paso na purba yuda e grupo di pashent aki,” e autor a splica.Nan ta agrega cu localisacion di e spirito di Pasco den e celebro por aumenta comprondemento tambe di e rol cu e celebro tin den e festividad cultural y tradicional, “haciendo un contribucion na e festividad di diferente cultura.”
Imagen di Pasco trigger actividad celebral
Durante di e fMRI, e 20 participantenan a wordo rekeri pa bisti bril cu video ta pasa door di nan unda cu nan a mira 84 imagen; e suhetonan a wordo mustra 6 imagen consecutivo cu tema di Pasco pa 2 seconde cada un, prome cu nan a wak 6 imagen di cosnan diario, y asina e secuencia a sigui. Despues di e scan, cada participante a completa un cuestionario unda cu nan mester a pone nan tradicionnan di Pasco y con nan ta sinti di Pasco y nan etnicidad. Basa riba e informacion aki, e investigadonan a aloca nan pa sea e “grupo di Pasco” (e grupo cu tin sentimento positivo pa celebracion di Pasco) of e “grupo no Pasco” ( e grupo cu no ta celebra Pasco y tin sentimento neutral pa e celebracion. E team despues a compara e scan di e celebro di ambos grupo pa wak si nan actividad celebral tabata diferente segun nan mira e imagennan.
Compara cu e participantenan den e grupo cu no ta gusta Pasco, e team a haya cu esunnan cu ta gusta Pasco a mustra hopi mas actividad den 5 area di celebro ora cu nan mira e imagennan cu tin di haber cu Pasco. Segun investigadonan, e areanan aki a wordo conecta cu cantidad di funcion, incluyendo spiritualidad u reconocemento di emocion di cara. Mas ainda, e autornan a agrega cu un di e partinan di e celebro cu a mustra mas actividad ta importante pa experiencia emocion cu otro individuo door di copia nan manera di haci. Esaki at e caso tambe cu un parti di e celebro cu ta encarga cu corda emocion contento y placentero comparti cu sernan keri. Comentando riba e implicacion nan potencial di e resultadonan, investigadonan ta bisa: “Comprondiendo con e spirito di Pasco ta funciona por provee un bista interesante den un area di e neuro psicologia di e ser humano y e por ta un herment poderoso den tratamento den sindroma manera e bah humbug syndrome. Tambe lo por compara patronchi di estudionan pa otro temporada manera Pasco grandi. E estudio aki por ta un prome paso importante den e ciencia di cultura y e asociacion di e ser humano cu nan tradicion di celebracion.”
E autornan ta enfatisa cu a pesar di nan resultado esaki mester wordo interpreta cu cautela y no literalmente ni tampoco limita na e actividad celebral solamente.
Fuente: Medical News Today
