Miembro di e team di maneho di departamento Maritimo, sr. Carlyle De Coteau a tuma nota den prensa local cu e boto La Rumbera cu nuebe persona abordo a presenta problema ora cu nan a keda sin gasolin riba lama. Tur cos a mustra cu tabatin un mal calculacion riba e cantidad di combustibel pa nan por a yega fei Barcadera pa Punto Fijo, sin problema.
“Bo no por subi lama pa un distancia largo sin suficiente gasolin”, el a declara na Bon Dia Aruba.
Sr. De Coteau a bisa cu despues cu el a wak un potret di La Rumbera cu tabatin nuebe persona abordo, e ta kere cu e boto aki no tabatin e capacidad pa carga tanta hende, specialmente pa realisa un trayecto largo. El a remarca cu den un situacion asina tur responsabilidad ta cay riba e capitan di e boto cu ta esun cu mester percura pa siguridad di e hendenan abordo.
Siguridad riba lama
El a laga sa cu aunke ainda e concepto di ley maritimo nobo no a bin cla, personal di departamento Maritimo ta percura pa siguridad riba lama. Aunke e no ta para den ley, semper nan ta sugeri y percura pa tur doño di boto tin nan ekipo di siguridad debidamente, entre nan salbabidanan. Tambe nan ta sugeri cu ora cu nan ta subi riba lama pa nan tin suficiente awa y combustibel.
Sinembargo cu decepcion el a laga sa cu tin doño di boto cu ta gewoon djis cumpli cu nan exigencianan di siguridad pa haya e permiso pa nabega di seis luna fei departamento Maritimo. Ya cu e control aki ta tuma cada seis luna riba un momento, tur cos lo por sosode den e plaso di tempo ey.
Tambe tin doño di boto cu ta biaha pa Venezuela cu e cantidad minimo di combustibel pa asina probecha di yena e tankinan di e boto te hasta tankinan extra di combustibel na un prijs sumamente barata compara cu Aruba. Ta e mesun situacion cu tabata presente ora cu hendenan na Hulanda tabata bay Belgica pa probecha e prijs mas barata di gasolin. Si tin doño di boto cu ta realisando e practica aki, esaki no ta un asunto di departamento Maritimo, pero locual semper nan ta conseha ta pa nabega cu suficiente combustibel pa evita problema riba lama. Nos lama –segun sr. De Coteau- tin e caracteristica cu unabes cu bo ta sali fei nos costa, bo ta topa cu lama grandi.
Ley Maritimo
Sr. De Coteau a bisa cu actualmente e ley Maritimo nobo tin mas cu tres aña pega na Departamento di Legalisacion y Asuntonan Huridico pa sigui su caminda pa Raad van Advies. E ta spera cu e concepto di ley aki pronto lo wordo aproba y drenta na vigor, ya cu den dje tur reglanan di siguridad ta bira un exigencia legalmente.
Tambe el a declara cu si bo ta abordo di bo boto bayendo un distancia largo, ya sea piscadonan cu ta realisa e actividad aki pafo di awa teritorial di Aruba of esun cu ta bay Venezuela cu boto pa Punto Fijo of otro destinacion, bo mester laga e famia na cas sa ki ora bo ta sali y ki ora bo intencion ta di yega bek. “Esunnan cu ta na cas mester sa precies unda bo ta bay y unda bo ta. Esaki ta yuda riba cualkier situacion di emergencia riba lama”, el a indica.
Ademas sr. De Coteau a bisa cu e permiso di nabegacion cu nan ta duna pa e botonan ta pa nabega den lama teritorial di Aruba so. Aunke e ta consciente cu e problema no ta sinta na Aruba ya cu pa añanan autoridadnan Venezolano a permiti pa botonan registra na Aruba lo por nabega y bay ya sea Punto Fijo y otro destinacion di e pais bisiña, sin permiso pa nabega internacionalmente.
