Bo no por cambia algo, si bo no ta compronde

Mi hendenan! E mucha di isla den mi no ta siña su les. Cana bay teatro den un camisa so, den friu pasobra ta sanger cayente mi tin. Leuk, lubida mi ta na Hulanda y ata mi ki cu un griep di otro mundo. Pero ban papia, pasobra drama tin.

Wel inicialmente, mi a “rant” un poco riba Facebook tocante con e situacion aki den caya grandi ta pone mi sinti. Pero mirando cu “Den Mi Cabes” podise tin un otro audiencia, ban ripiti un poco. Ta asina cu e mal contento cu tin cu caya grandi, ta algo cu masha tempo mi ta predica riba dje. Riba Facebook, Twitter, mi so cu mi so den mi camber, cu mi amigonan, etc.

En general, mi ta masha en contra con hopi Aruba a wordo Americanisa y con hopi esencia nos a perde a cambio di “turismo”. Mi ta ripiti pa di mil y un biaha, un hende cu ta bin Aruba gosa pa 14 dia, no por wordo duna privilegio riba un cu ta riba e isla 365 dia pa aña. Pasobra den ki mundo e ta husto cu despues cu comerciantenan local a sufri y wanta asina hopi bou di nomber di “progreso” nan ta bin haya asina un ZARA, pa competi cu ne na cuminsamento di caya? Esey ta e prome. Por Dios, ZARA no por a wordo manda Palm Beach Area? Ken su idea esey? E ciudadano comun y coriente a sufri lunanan largo pa por yega su trabou den caya, pa ora e caya ta cla e tin cu paga pa parkeer, pero e turista ta haya free ride den tram asina e baha for di barco. Tur cos den nomber di “progreso”, wantando na e speransa cu cos lo bira miho.

Y no ta cu mi ta un experto, mi ta comprende pakico Aruba a recuri na turismo, mi ta comprende cu e ta e pilar di nos economia, cu ora Lago a cera, placa mester a drenta di un caminda of otro pero a yega na e punto cu nos ta basicamente sclavisa nos mes pe y mi no ta kere esey tabata e idea. Gobierno na luga di diversifica y busca mas oportunidad pa nos pueblo ta keda inverti den turismo. Nos hendenan ta trahando shiftnan brutal den sector di hospitalidad y no ni ban papia di structura di poder den un hotel. Nos tur sa cu e miho posicionnan masha poco ta wordo duna na localnan y na final di dia un sociedad cu ta orienta riba “hospitalidad”, no ta conta cu e necesidad di ta hopi intelectual pasobra e motor di hospitalidad ta brinda servicio. Sin intencion di ofende niun di nos hende balentenan cu ta lanta tur dia traha na hotel, boso trabou tin balor y boso tin balor y lo mas importante ta pa tin un trabou y gana bo pan na un manera husto, pero e berdad ta e berdad.

Comerciantenan a fada y a cuminsa welga, wel aleluya. El a tuma nan largo, pero esaki ta conta bo e realidad di sociedad Arubiano. Nos ta hende pasivo, hende cu no ta gusta conflicto, hende amabel, pero ta basta. Bo ta scucha hende bisa nan ta cansa di wak negativismo y hende ta keha, ma bon ta kico bo ta kere hende cu no ta feliz ta haci? E echo cu masha poco hende ta bay den caya no solamente tin di haber cu e echo cu hende di berdad ta pasando den duro, sino mas bien e manera di expresa rabia di un pueblo cu ta sinti cu nan a wordo traiciona. Caya Grandi tabata tin un nificacion grandi pa hende di Aruba, e tabata un parti hopi intimo di cultura y e problema no ta cu el a wordo cambia, sino mas bien cu nan kier a cambia su audiencia. Mi hendenan, e yama caya Betico Croes, e ta carga e nomber di un hende cu a lucha pa su pueblo, cu tabata kier pa nan tin un stem den nan mesun cas.
E no ta caya Clinton, e no ta caya John F Kennedy. E tragedia di Caya Grandi ta cu nos ta sinti cu nos a perde algo cu tabata intimamente di nos, pasobra den un manera nos a.