Un dama cu a keda na e shelter di Fundacion pa Hende Muhe den Dificultad, kier a comparti su storia cu comunidad. E ta prefera sinembargo pa keda anonimo anto a dicidi di bin dilanti pa falta di conscientisacion riba e tema di abuso domestico y kico pa haci ora di confronta un situacion asina.

No mester para wanta y guli tur cos, na Aruba hopi cos ta scondi. Hopi hende muhe ta pasando den cos cu nan no mester para wanta pasobra tin caminda pa cana. Anto e fundacion ta un caminda pa hende acudi, e ta conta Bon Dia. Desde aña pasa, Bon Dia Aruba a trece varios publicacion informativo di e Fundacion pa Hende Muhe den Dificultad. Esaki cu e meta pa mantene comunidad informa constantemente riba e tema, mescos cu nos ta haci cu varios otro fundacion tambe cu nan tema corespondiente. Tambe nos kier pone atencion structural riba abuso domestico como cu e ta un problema grandi riba nos isla.

E biaha aki nos a combersa cu un dama, ex cliente na e shelter di e fundacion aki, cu ta desea di comparti su testimonio di experiencia na e shelter. Esaki segun e ta splica nos, ta pasobra hopi hende muhe no sa kico pa haci ora ta enfrenta den situacion di abuso domestico y unda pa bay.

Casa pa 20 aña
E dama ta conta nos cu el a acudi na e fundacion despues di algun situacion fastioso cu el a haya su mes aden tempo cu e tabata casa. El a pasa den un relacion caminda casa pa 20 aña, e tabata cu un persona cu tabata kier a dicidi tur cos pe y manda riba dje. E dama ta conta nos cu e semper tabata un muhe para den su sapato cu no a acepta tur cos for di su casa, cual tabata haci su casa mas agresivo. Manera cu tabata tin cierto compromiso of actividadnan di trabao cu e dama mester a acudi of hasta ora di bishita famia, akinan problema tabata start. E dama su buchi a yena ora cu na un di e ocasionnan aki cos a bay for di man relaciona cu un actividad di trabao cu e mester a atende. “El a ataca mi, e kier a dal mi. T’e dia mi a sali for di cas cu mi baby, cual tabata un caminda hopi fastioso pa mi.” E dama tabata tin miedo pa su bida, y mester a keda algun dia cerca algun familiar.

Por medio di polis, a logra bay na e shelter di fundacion, unda cu el a keda tres luna. “Mi no tabata sa mes cu e tabata existi.” Tres luna tabata e maximo cu e por a keda anto e no tabata tin caminda pa bay, ni tampoco ta sinti safe. A base di esey a resulta cu e mester a keda un tempo extra mas na e shelter. E dama ta laga sa cu el a sinti hopi safe durante su estadia na e shelter, e ta e cos adecuado pa haci den un situacion asina y e fundacion ta haci un bon trabao den esaki segun e ta splica.

Depresion y apoyo
E dama ta conta nos cu pa un periodo el a cay den depresion y a haya hopi apoyo for di su dunado di trabao, pa motibo cu e mester a keda algun siman sin traha. “E contact cu mi tabata tin cu mi hendenan di hopi cerca, a yuda mi. Mi mama, y hendenan hopi cerca di mi so tabata sa. E psicologo cu e shelter a regla pa mi, cu e papiamento poco poco a pone mi sali for di esey. E no tabata facil. Y danki dios cu mi tabata tin un trabao, pasobra si tabata di depende financieramente di e homber, bo no por logra tampoco.” E señora ta bisa nos cu el a sigui pa dilanti, cual e forsa ey ta individual pa tur hende. E ta bisa cu como hende muhe bo no mester para wanta golpi y bo por kies pa no wanta abuso di ningun forma.

Team multi disciplinario
Algun luna pasa, e fundacion tabata tin un encuentro cu varios instancia y fundacionnan pa dialoga riba un manera nobo pa combati violencia domestico. E fundacion a bisa nos cu despues di 21 aña, nan a ripara cu victimanan di violencia domestico no ta haya e ayudo cu mester, manera cu e tin mester, anto na momento cu tin mester. Pues den april instancianan manera Departamento di Asuntonan Social, Slachtofferhulp y otro fundacionnan a bini hunto pa un mainta informativo pa yega na un plan. E plan ta pa esaki bira un cooperacion nacional entre nan manera un Multidisciplinaire Interventie Team pa atende cu cualkier persona, sea muhe of homber, cu ta den un situacion di violencia domestico.

Bon Dia lo sigui informa nos lesadonan riba e desaroyo di esaki y punto di bista di e instancianan concerni riba e tema e dianan y simannan nos dilanti.