Bo contribucion ta necesario pa mehora calidad di bida na Cas Sjabururi

ORANJESTAD – E aña aki Stichting voor Verstandelijk Gehandicapten Aruba (SVGA), ta haci 55 aña di existencia. Den e 55 aña aki nos tin nos nificacion grandi pa Aruba su comunidad, den e cual nos por a demostra nos derecho di existencia.

Nos ta ofrece guia, cuido y educacion na e personanan cu deficiencia intelectual. Boso a yega di tende of conoce e diferente departamentonan di nos Fundacion: Pasadia Bibito Pin, Scol Dunuman, Centro Man na Obra, Pasadia Briyo di Solo y Cas Sjabururi. Bo por haya mas informacion riba nos web site www.svga.aw.

Tin un proyecto hopi importante cu nos kier pa e bira un realidad e aña aki y esaki tin di haber cu e ampliacion di e Cas pa Remplaza famia e cual ta Cas Sjabururi. Nos kier ofrece na nos 12 habitante actual nan propio camber y di e manera aki cada un por tin nan privacidad, asina nos ta evita problemanan di conducta y cada un por tin nan sosiego den nan mes un camber, tur esaki debi cu na e momentonan aki nos tin 2 of 3 persona den camber; e plannan di construccion y e permiso ta na ordo. Ainda nos no tin e fondonan suficiente pa por implement’e manera debe ser.

Podise boso lo a ripara cu Superfood ta pidi donacionnan pa nos Fundacion e luna di april, 100% di e placa cu lo drenta di e donacionnan, lo bay pa e proyecto aki, via CedeAruba. Masha danki na Superfood pa e bunita gesto, pa duda nos e oportunidad di yuda mehora calidad di bida di e habitantenan di Cas Sjabururi y haci nos mas conoci den comunidad.

Nos ta spera di por logra un bon donacion via Superfood, hunto cu e fondonan priminti door di Hulanda via Samenwerkende Fondsen, nan no lo yega pa nos por keda full cla cu e proyecto. Nos tin mester di Afls 200.000.00 pa e proyecto por bira un realidad.

Pa e motibo aki nos ta pidi comunidad di Aruba en general pa nan por haci nan contribucion na nos Fundacion pa sigui duna calidad di bida halto na e habitantenan di Cas Sjabururi. Bo por haci bo donacion via Superfood of e por bay directamente na nos cuenta di banco. Diferente compania na Aruba lo ricibi tambe un carta cu e peticion aki.

Stichting voor Verstandelijk Gehandicapten Aruba

Piedra Plat 86 – A

CMB nr. 91603209

Masha danki di antemano pa yudanos cumpli cu nos meta.

Si tin algun pregunta of remarca por tuma contacto libremente cu nos na telefon: 522-7842 of via nos mail adres: info@svga.aw