(AP) – Jeff Bezos su Blue Origin a lansa su prometida Lauren Sanchez den espacio dialuna cu un tripulacion di hende muhe cu a inclui Katy Perry y Gayle King.
Esaki ta e ola mas recien den turismo di espacio, unda mas persona rico y famoso – of esnan cu suerte y bon conexion – por drenta e mundo di 0 gravedad cu tradicionalmente ta domina pa astronautanan profesional. E rocket New Shepard a haci e trip lihe na West Texas, dunando tiki minuut precioso sin peso algun.
Sanchez, ken ta piloto di helicopter y ex reportero di television, a invita otronan pa forma parti di e vuelo completamente automatisa y di 10 minuut, reclutando e strea y cantante Perry cu co-anfitrion di “CBS Mornings” King. Conmovi pa e imagen di planeta tera, PErry a bisa cu e no por a resisti canta “What a Wonderful World” den espacio.
Tambe compartiendo e biahe tabatin productor di pelicula Kerianne Flynn; Aisha Bowe, ex ingeniero di NASA cu a cuminsa su propio companianan pa promove educacion den ciencia y Amanda Nguyen, un cientifico cu a studia planetanan rond di otro streanan y awo ta boga pa sobrevivientenan di violencia sexual.
Blue Origin a nenga bisa con hopi e vuelo a costa ni tampoco ken a paga kico. E biahe a yega 2 luna prome cu Bezos y Sanchez su boda na Venecia.
Esaki ta e 11 vuelo espacial pa e compania basa na Washington State, funda pa Bezos den aña 2000 despues di a genera un fortuna cu Amazon. Bezos a forma parti di Blue Origin su prome vuelo turistico den espacio na aña 2021 y a compaña e tripulacion mas recien.
E lansamento di celebridad aki ta e prome den en acion unda hende muhe a yena cada asiento. E unico otro tripulacion cu tabata forma completamente pa hende muhe den 64 aña a tuma luga den 1963. Esaki ta tempo cu cosmonauta Sovietico Valentina Tereshkova a bay espacio su so, birando e prome muhe den espacio. Tereshkova a pasa 3 dia fuera di e planeta.
Hasta despues di e lansamento mas recien, hende muhe ta representa apenas 15% di e mas di 700 persona cu a biaha bay espacio. Sanchez a bisa cu el a deliberadamente scoge hende muhe pa bay cune, cada un di nan emociona pa inspira ambos grandi y chikito di soña grandi y te hasta a manda traha trahenan special.
E lansamento a hiba figuranan VIP na West Texas incluyendo Oprah winfrey, Kris Jenner y otro miembronan di e famia Kardashian; ex astronauta di NASA Mae Jemison, ken a bira e prome muhe di color scur den espacio na aña 1992 y varios otro hende muhe cu anteriormente a forma parti di vuelonan priva. Winfrey, un amiga cercano di King, tabatin lagrima den su wowo ora cu e capsula a yega espacio y por a tende e pasaheronan asombra cu e luna y gritando cu felicidad.
Mientras e muhenan tabata preparando pa e vuelo di regreso, Perry a cuminsa canta. A pesar di peticion di e demas tripulantenan, el a nenga canta “Roar” of su otro canticanan y a opta pa canta “What a Wonderful World.”
“E no ta tocante ami. E no ta tocante canta mi canticanan,” Perry a bisa despues di e vuelo. “E ta tocante e energia colectivo aya. E ta tocante nos.” Na un conferencia despeus, el a enfatisa, “nos no tabata solamente asimilando espacio. Nos tabata creando espacio pa futuro.”
Bezos a habri e capsula algun minuut despues cu el a yega tera, brasando Sanchez, e prome cu a sali. Ora cu nan a sali, Perry y King a bay na rudia y a sunchi e vloer. “Esey tabata increible,” King a bisa, ken ta considera su mes un persona ansioso ora di bula den avion.
3 ora despues, Sanchez a comparti cu e tabata purbando di procesa tur cos ainda. “Profundo ta e unico palabra cu mi lo usa,” el a comenta.
Esaki no ta e prome biahe di Blue Origin cu nombernan grandi.
Actor di “Star Trek” William Shatner a bay espacio cu Blue Origin den 2021 ora cu e tabatin 90 aña, pronto despues di Bezos su vuelo inaugural. El a ser sigui pa ex hungado di New york Giants y anfitrion di television Michael Strahan y Laura Shepard Churchley, e yiu mas grandi di astronauta Alan Shepard, na honor di ken a nombra e rocket. Dos pionero di aviacion cu no a logra bay espacio ora nan tabata chikito – Wally funk y Ed Dwight – tambe a bay cu 82 y 90 aña respectivamente.
Mayoria di Blue Origin su pasaheronan – cual ta 58 contando e biahe ultimo – ta hende di negoshi, cientifico, anfitrion di television of youtuber. E prijs di e pasashinan no tarevela.
Russian Space Agency tambe a lansa su cantidad di turista na espacio, cuminsando cu un experto den finanzas di California den 2001. Dos decada despues, un actris Ruso a graba abordo di International Space Station.
Elon Musk su SpaceX tambe ta bende biahe di varios dia na clientenan priva. SpaceX su prome cliente tabata emprendedor biyonario di tecnologia Jared Isaacman, y ya caba el a bay dos biaha y a haci e prome cana den espacio priva. Awo e ta den linea pa bira NASA su proximo administrador si e keda confirma pa Senado.
Inversionista di bitcoin Chines Chun Wang a caba di regresa for di e prome vuelo espacial cu a hiba hende for di North Pole pa South Pole. Wang a paga SpaceX pa su persona y 3 otro explorador, un suma cu no a revela.
“Den e era emocionante aki di vuelo espacial comercial, e soño di bira un astronauta no ta limita na un par so mas,” Wang a publica riba X siman pasa.
