Blue Blocks Project” Iniciativa di hobennan pa conscientisa comunidad pa cuida nos beachnan y naturalesa

Patrick Beke hunto cu amigo Cado de Lannoy y Ashlin Ahlip a bin cu e idea pa cuminsa locual nan a yama “Blue Blocks Project”, como cu nan ta pasa hopi tempo na lama y den naturalesa, y hopi biaha ta wak hende ta pasa cu Jeep y Quadracer den e duinen. Esey ta destrui esakinan pues a bin cu e idea pa pone algo pa avisa hendenan pa cuida esaki.

Asina a cuminsa pensa riba e miho manera pa haci esaki y a pensa riba bloki, como cu nan lo wanta mas miho contra e salpeter y otro elementonan cu e ta wordo exponi na dje. Segun Sr. Beke a busca blokinan cu tabata den mondi benta y cu hende ya no ta haci uzo di nan, acumula nan y a verf nan. Bula Surf Shop ta e compania cu a sponsor tur e material pa haci esaki posibel. Hunto cu grupo di amigonan a logra pinta esakinan y haci henter e proyecto posibel y a bira locual cu e ta awo.

Localidadnan

Segun Sr. Beke a sigui splica Bon Dia Aruba, e blokinan a wordo poni na 17 luga. Westpunt, Duinen, Boca Druif, Wariruri, Boca Bayena, Andicuri,Shark Bay, Boca keto, Dos Playa, Grapefield, Boca Grandi, Alto Vista entre otro. Y e mensahenan poni riba e blokinan ta varia di “Please keep our beach clean”, “Don’t drive on the dunes” y “Don’t drive on the beach”.

“Nos ta pensa pa haci un di dos fase, pero nos kier a crea un espacio pa lanta hendenan for di soño y conscientisa riba e situacion.” El a bisa cu si un hende no sa, e no por aprecia esey, pues cu e mensahenan aki ta spera cu hende por wordo conscientisa y cuida locual cu ta di nos. E grupo di hoben aki a pone e potretnan riba Facebook y esakinan a haya hopi bon reaccion di comunidad, y ta apoya e mensahe cu nan a trece dilanti. E blokinan ta pinta un nechi color blauw bibo, cu letternan geel, cual ta resalta den naturalesa.

Finalisando el a enfatisa riba e importancia di cuida e beachnan y henter Aruba. “Esakinan ta di nos, si tur hende contribui na esaki tur hende lo por keda disfruta di e bunitesa.”