(CNN) – Despues di mas cu un siman di blokeo cu a afecta e careteranan principal di Colombia, como protesta contra e aumento di prijs di diesel, e representantenan di e basenan di transportadonan di carga a yega na un acuerdo cu Gobierno di Gustavo Petro cu a permiti lantamento di e welga di transporte aki ayera diabierna.
Alcalde di Bogota, Carlos Fernando Galan, a informa den un mensahe publica na red social “X” cu “a reactiva scolnan di districto y oficialnan a regresa na trabou.”
Transportadonan di carga y pasahero a para nan truck, bus y tur tipo di auto cu ta usa combustibel diesel den diferente area pa stroba trafico den rechaso di e medida anuncia door di Gobierno pa aumenta 0.46 cen pa galon (ekivalente na 3.7 liter), dunando un costo di US$ 2.79.
Diahuebs ultimo, Galan a destaca cu “mas di 1.200 elemento di Polis di Bogota apoya pa un helicopter y seis drone” a wordo desplega pa des blokia e puntonan critico. Ademas, Bogota su sistema di transporte masal, Transmilenio, a informa cu tabatin alrededor di “5.124.854 usuario afecta y 114 bus a ser vandalisa.” E areanan mas afecta tabata Usme, San Cristobal, Ciudad Bolivar, Kennedy, Bosa, Suba, Usaquen, Chapinero y Soacha.
“Den e sector di Molinos, tabatin enfrentamento entre hombernan cu cara tapa y Polis, causando daño na bentananan. Afortunadamente, e situacion ta bou di control y no a raporta heridonan grave, aunke ambulance di sistema di salud a evalua cuatro persona,” Galan a informa.
Entre loke a keda acorda, Ministerio di Transporte a informa pa medio di un comunicado cu “aumentonan adicional” lo keda suspendi te ora cu logra transformacion structural den e sector, estableciendo tabelnan tecnico cu ta permiti haci ahustacion regulatorio. E aumento di prijs lo keda na 0.19 cen di dollar (800 peso Colombiano) e costo di e ACPM den aumento di 0.096 cen di dollar (400 peso Colombiano) for di e modificacion di resolucion 40350 di 29 di augustus y otro 0.096 cen dollar (400 peso Colombiano) desde dia 1 di december.
Di su parti, presidente di Colombia, Gustavo Petro a bisa cu “Nos a resolve e welga di e transportadonan mas lihe cu nan a pensa y na e miho manera. Pabien na e chauffeurnan di truck chikito cu a sa di pone nan agenda di demanda como prioridad y no agendanan straño,” a indica e hefe di estado den su cuenta X.
El a agrega cu Gobierno Nacional lo cumpli cu e palabracionnan yega na e diferente mesanan di negociacion. “Pabien na e ciudadanonan cu tabatin pasenshi y no a conduci na confrontacionnan den seno di pueblo mes. Un pabien na e forsanan publico cu a actua cu prudencia democratico”, asina e mandatario a bisa.
