(AP) – Algun usuarionan di rednan social ta criticando celebridadnan pa loke nan ta bisa ta un falta di accion den bista di un crisis humanitario na Gaza, y nan a cuminsa un “blockout” pa pone presion na e celebridadnan pa tuma un posicion.

Pa e blockout, e usuarionan ta blokia e cuenta di cierto celebridadnan riba plataformanan di rednan social manera X, TikTok y Instagram, causando cu nan no lo mira ningun tipo di contenido di nan. Algun a publica tocante e celebridadnan cu nan a blokia caba, usando #blockout, #blockout2024 of #celebrityblockout, mientras otronan a comparti publicacionnan di usarionan ta critica e celebridadnan cu a atende eventonan di glamour manera Met Gala y ilustra e contraste di esaki cu e situacion na Gaza.

Participantenan di e blockout aki ta bisa e ta un protesta pa motibo cu e celebridadnan of no a papia tocante e tema of no a bisa suficiente tocante Israel su accionnan na Gaza durante su guera cu Hamas. Desde cu e guera a cuminsa dia 7 di october cu Hamas su atakenan, e ehercito di Israel a asesina mas di 35,000 persona na Gaza segun e pais su Ministerio di Salud, cual no ta distingui entre ciudadanonan y personanan den e combate.

Con e ‘blockout’ ta funciona?
 Riba plataformanan di rednan social, usuarionan ta mira contenido di personanan cu nan ta sigui ademas di e personanan cu e algoritmo scoge. Den ambos instancia usuarionan por scoge entre silencia of blokia un persona of cuenta.

Blokia e cuentanan di celebridadnan of influencer ta nifica cu bo no lo mira ningun di e contenido cu nan ta produci riba rednan social. Ningun publicacion, ni potret ni video, ni colaboracionnan cu sponsor. E cantidad di persoan cu interactua cu e contenido ta genera placa, cual ta nifica cu e blokeo tin e meta di afecta bistanan, participacion y claramente e placa genera.

E blokeo tambe tin e meta di bay contra e celebridadnan su marca pa medio di hala bista y atencion for di nan contenido.

Ken ta siendo blokia?

No tin un solo lista organisa di celebridadnan cu ta ser blokia. Algun usuario ta ofrece sugerencia di celebridad, mientras otronan ta dicidi pa nan mes. Celebridadnan na Merca y mas a ser nombra den e blokeo.

Blokia ta keda na cada usuario personalmente. Y cada celebridad, influencer of creador di contenido mester keda blokia individualmente riba cada plataforma.

E blokeo a cuminsa den medio di manifestacionnan tocante e guera entre Israel y Hamas. A cuminsa presta atencion na kico e celebridadnan y influencernan ta of no ta bisando, cual a haya un boost di Met Gala siman pasa.

E fiesta anual ta atrae un gran cantidad di cara famoso for di e industria di deporte, moda, musica y pelicula. E ta conoci pa e yegada di e celebridadnan den vestuarionan elabora. E ana aki, e gala a ser rondona pa manifestacion durante practicamente henter e anochi.

Rednan social tabata yena cu imagennan di e evento luhoso, mientras cu na mesun tempo, imagennan a circula di un operacion militar cu Israel a lansa na Rafah. Esaki a causa cu usuarionan a cuminsa enfatisa e contraste entre e gala su luho y esun di e celebridadnan y e situacion na Gaza, usando imagen di ambos y condenando e celebridadnan pa no usa nan platafroma pa papia pa e personanan cu ta sufriendo.