(AP) – Secretario di Estado Mericano, Anthony Blinken a bisa diabierna cu “demasiado” Palestino a fayece y a sufri mientras Israel ta sigui cu un guera fuerte contra e grupo militante Hamas den Gaza Strip. El a urgi Israel minimalisa e daño causa na ciudadanonan y maximalisa e asistencia humanitario cu por yega na nan.
Papiando cu reporteronan na New Delhi, Blinken a bisa cu movidanan reciente di Israel pa mehora e condicionnan critico na Gaza mientras ehercito ta pausa operacionnan pa permiti e Palestinonan move di e sitio, ta positivo pero no ta nada cerca di ta suficiente. “Mester haci hopi mas trabao pa proteha e ciudadanonan y asina sigura cu e asistencia humanitario lo yega nan,” el a expresa. “Demasiado Palestino a ser asesina, demasiado a sufri e simannan aki y nos kier haci tur loke ta den nos man pa por preveni daño na nan y maximalisa asistencia cu por yega na nan.”
Blinken a papia mientras e tabata culminando un tour diplomatico di 9 dia, su di dos biahe desde cu e guera entre Israel y Hamas a cuminsa.
Na Gaza, lidera pa Hamas, e Ministerio di Salud a bisa diabierna cu e morto di Palestinonan a surpasa 11,000 persona. Mas di 1,400 persona a ser asesina na Israel y esaki tabata mas tanto durante e atake inicial di Hamas.
