(AP)—Secretaria di Estado demisionario Antony Blinken ta consehando mundo “pa no gasta mucho tempo” riba loke presidente-electo Donald Trump ta bisando tocante Groenlandia.
Trump a haci su mes cla atrobe e siman aki cu e lo kier e teritorio semi-autonomo di Dinamarca bin bao control di Merca y a bisa cu e no lo descarta forsa militar pa logra esaki. “Nos mester Groenlandia pa motibonan di seguridad nacional,” Trump a bisa.
Pero Blinken a bisa diaranson cu e ambicion di e presidente binidero tin tiki chens pa manifesta na algo cu no ta solamente djis papia. “E idea expresa tocante Groenlandia obviamente no ta un bon idea,” segun e diplomaat mayor a bisa durante un biahe pa Paris pa reunionnan.
“Kisas mas importante, e ta obviamente un cu no ta bay pasa. Pues nos probablemente no lo mester gasta tempo papiando di esaki,” el a bisa.
Minister di Asunto den Exterior di Francia, Jean-Noël Barrot, tambe a minimisa cualkier posibilidad di forsanan Mericano desplega contra Dinamarca, un aliado Mericano den e aliansa militar di NATO. Pero Barrot a adverti asina mes cu Europa mester wanta pa turbulencia den futuro—mientras otro poder ta tira nan peso rond.
“Nos ta pensa cu Merca lo invadi Groenlandia? E contesta ta ‘no,’” E minister Frances a bisa. “Pero nos ta kere cu nos ta drentando un periodo cu lo mira e regreso di e ley di lo mas fuerte, e contesta ta ‘si.’”
Europa mester bira militarmente mas fuerte y economicamente y comercialmente competitivo den su respuesta,” Barrot a bisa. “Nos mester bay mas leu pa afirma kico nos ta, kico nos kier,” el a bisa.
E prome minister Danes, Mette Frederiksen, a bisa cu e no ta kere Merca lo usa poder militar of economico pa sigura control riba Groenlandia ya apela pa e comportamento di Merca “ta respetuoso pa e pueblo di Groenlandia.”
Na Alemania, Canciyer Olaf Scholz a bisa diaranson cu e principio di inviolabilidad di fronteranan ta aplica pa tur pais, no importa con poderoso nan ta, den un reaccion pa e remarcanan di Trump cu no a menciona e presidente-electo pa nomber. “No mag di forsa frontera pa move,” Scholz a bisa.
