Blame game tocante hotel… A cuminza caba…

Aparentemente e accionnan cu cierto ciudadano a tuma pa denuncia e continuacion sin tregua di crea mas hotel, a haya un efecto. No completamente positivo si, ya cu ta trata di un tipo di ‘blame game’ di politico cu ta tira culpa riba otro. Den nos edicion di diahuebs e siman aki nos a duna relato di loke e ex-ministro encarga cu Infrastructura di fin di 2017 te fin di 2019, a declara encuanto e tema aki. Mas tempran e aña aki nos Promer Ministro, actualmente encarga cu Infrastructura, a declara cu e permiso pa construccion di e hotel cu tabata den noticia pa e problema di nan deseo cu Aruba mester traha beach pa nan unda no tin, tabata otorga pa un gobierno anterior na esun cu e ta lidera. Esey por bien ta berdad, pero ta necesario pa nos por tende algo mas cu mustra riba culpabilidad den pasado. Fuera di esey ta keda un hecho cu e permiso duna finalmente aña pasa pa traha e beach, a ser otorga pa su persona mes, sin cu a reaccciona riba e hecho cu e compania no a cumpli cu condicion poni den e permiso. Ademas, tempo tabatin discusion tocante e posible yegada di un hotel mas panort di Marriott, tabata gobierno di su partido cu no kier a tende di busca otro solucion y no sigui traha hotel na e sitio ey, y a otorga e permiso pa esey.

Awor, bolbiendo na e caso di e ex-ministro cu ta busca entrada den politica atrobe, mientras ainda no tin vista riba avance ni suspension di e caso penal den cual su persona ta e acusado principal, ta asina cu nada o casi nada di e maneho cu a conduci na tanto miles di camber di acomodacion turistico ta cay bao di su responsabilidad? Segun e ex-mandatario, tempo el a asumi responsabilidad pa Infrastructura na fin di 2017, tabatin permiso pa 6.170 camber duna caba den e gobierno(nan) anterior. Esey por ta berdad, pero cu esey no ta bisa cu su persona no tabatin nada di haci cu e maneho cu su partido di e tempo ey tabata hiba. Berdad tabatin un colega, awendia tambe acusa, y hasta condena pa corupcion cu tereno publico, responsable pa emision di permiso pa tereno, pero como ministro encarga cu Turismo e tabatin un voz importante den e maneho encuanto atrae mas inversionista den e sector aki. Y ta su persona cu a opone introduccion di un moratorio den ultimo lunanan di 2010, despues cu un comision consultivo, bao di su instruccion, a yega na e recomendacion di un moratorio, mas specificamente den un ley. E motibo pa pone e moratorio den un ley tabata pa haci mas dificil cu despues ta bin otro mandatario cu relativamente facil por deshaci di e moratorio. E tempo ey, segun e cifranan resalta den e rapport ey, tabata previsto caba un aumento di alrededor di 4500 camber pa aña 2011 y despues. Di 2010 pa 2017 ta basta tempo, asina ta cu nos por kere cu e cifra ey di 6170 ta corecto. E punto ta cu si awe e ta desea di declara cu e aumento ey no tabata su deseo y cu el a lucha solamente pa e proyectonan den cual e tabata kere, entre otro na Sero Colorado, nos tin motibo pa duda di esey. Tabata su persona mes cu tabata promociona un plan riba e plateau di Sero Colorado, unda lo tabatin espacio pa varios hotel, no solamente pa loke awe ta Secrets, sino cu en total den e area lo a bin alrededor di 2.500 camber di hotel. E deliberacionnan cu gremionan no a tuma lugar cu su colega di Infrastructura, sino cu su persona como mandatario encarga cu Turismo. Den un di e conversacionnan ey a trece dilanti cu 2.500 camber na San Nicolas, cu un mercado laboral incapaz pa absorbe un demanda asina, di por lo menos 5.500 cupo di trabao, e contesta tabata cu “ta importa anto loke no tin localmente”…

En todo caso, pa nos suerte no a logra trece e otro inversionistanan cu lo mester a percura pa sigur 1.500 camber mas, asina ta cu nos no mester importa 5.000 trahador na San Nicolas so caba, pero henter e asunto ta ilustra ta unda e fayonan den nos sistema gubernamental ta, specialmente ora ta trata di planificacion a largo plazo. No por ta asina cu ora ta trata di proyecto grandi, cu lo tin efecto grandi a largo plazo, semper tin un pura, hasta ansia, pa core termina e contratonan, y esnan cu ta trece dilanti cu mester contempla e posible efectonan a largo plazo, ta keda mal mira, ta ser someti na critica cu nan ta negativo, cu nan ta stroba progreso, etc. No ta pornada na varios ocasion ta resulta despues cu no a cumpli cu tur requisito, entre otro di reportahe riba efecto medio-ambiental, y si acaso tin reportahe mes, esaki ta keda scondi via e secretismo eterno di nos gobierno(nan).

Kico si mester sucede? Nos ta spera cu ora tur hende caba di culpa otro, nos haya ainda un contesta riba e pregunta clave: Y kico awor? Kico ta bay haci mirando pa futuro, independiente di ken a pega barco den pasado? Tin sentido ainda pa impone un moratorio? Y con ta bay deal cu e consecuencianan di adicion di miles di camber na loke tin caba, den e proximo añanan? Nos ta spera mas di gobierno cu simplemente drenta reunion na parlamento pa tene otro ‘trash talk’ pa deshaci di nan contrincantenan.