Ayera desde mainta 10 or y 15 Corsou a bay plat. No tabatin coriente pa oranan largo, y a tarda basta prome cu Aqualectra por a reestablece servicio electrico riba e isla.
Tabatin varios factor cu a haci cu e compania di electricidad no por a cende coriente bek, segun directiva di Aqualectra. Coriente a bay pasobra tabatin un candela na CRU (Curacao Refinery Utilities). CRU ta suministra mas tanto refineria Isla, pero nan ta conecta cu e red di Aqualectra tambe. E candela a causa un cortocircuito pa cual eventualmente produccion di tur unidadnan di Aqualectra a cay afo automaticamente.
E compania a asumi cu e prome barionan lo por a haya coriente bek despues di 4 of 6 ora, pero despues di haci varios intento, esey a parce di ta imposibel, pasobra segun e director Darick Jonis e red ainda tabatin ‘falta di stabilidad’. “E sistema di control maneha pa computer a traha contra e activacion di e red”, Jonis a bisa. Esaki a bin pa via cu e red a cay abruptamente. P’esey despues di atardi tabatin e mesun situacion te anochi, mientras cu Jonis a premira cu pa anochi Corsou lo haya coriente bek.
Varios scol y kantoor a cera porta, y despues di merdia tabatin hopi menos trafico riba caya. Tur hende kier a simplemente haya sa ki ora coriente ta bin bek. Ora coriente bin bek lo mester pone Sehos riba e red bek prome, mescos cu aeropuerto Hato. Djey lo por cuminsa suministra coriente bek na e barionan. No ta conoci kico a causa e candela di CRU na e tereno di refineria, pero Jonis ta duda cu lo ta un acto di sabotahe.
E ultimo biaha cu Corsou tabata den blackout pa via di un cortocircuito tabata den 2006. Den 2016 tambe tabatin hopi cas y negoshi sin coriente, pero esey tabata pa via di un protesta laboral masal. Desde e centro di e edificio di Aqualectra na Nieuwe Haven ta canando trabou pa resolve e problema, cual ta dificil mirando cu e central mes tin cierto partinan sin coriente.
