Na Aruba tambe VOZ a wordo lanta contra cualkier forma di racismo of discriminacion.
Mientras cu na Merca y den mundo, miles di hende a yega di manifesta nan indignacion contra racismo, na Aruba a tuma luga un ‘open air conversation’, riba plaza Betico Croes ayera tardi. E consigna tabata: Black Lives Matter.
Entre otro, e linguista Ramon Todd-Dandare a expresa su mes bisando cu na Aruba tambe ta tuma lugar diferente tipo di discriminacion. Te hasta el a referi na su experiencia personal, ora cu el a yega mucha di Colombia pa bin biba na Aruba. “Nan tabata yama mi Colombiano barata.” No solo e ta haya cu e discriminacion ta relaciona cu racismo, sino entre otro contra hende muhe y stranhero cu ta bin busca un miho porvenir.
Durante e combersacion aki al aire libre a wordo treci dilanti cu durante e decada turbulento di añanan 60 tabatin hende di e generacion ey cu tambe a lanta nan voz di protesta contra racismo. A haci un yamado riba e situacion actual genera pa e caso ultimo di abuso di autoridad policial cu a costa bida di George Floyd na Merca.
E hendenan di awendia mester ta mas uni sin importa raza of nacionalidad. P’asina e generacion futuro por biba den un mundo, unda derecho humano ta prevalece. Un yamado a wordo haci pa esun presente por trece dilanti nan experiencia personal.
