(AP) — E prijs di bitcoin a cay bao $50mil ayera mainta despues cu CEO di Tesla, Elon Musk a tweet un dia prome cu e fabricante di auto electrico lo stop di acepta e criptomoneda como pago pa su vehiculonan.
Musk diaranson a cita preocupacion ambiental pa e cambio di politica.
“Nos ta preocupa tocante e aumento rapido den uso di combustibel fossiel pa mina Bitcoin y transaccionnan, specialmente carbon, cu tin e pio emision di cualkier combustibel”, Musk a bisa riba Twitter. El a agrega cu e criptomoneda ta ‘un bon idea riba varios nivel’, pero no su promesa no por bin na ‘gran costo pa medio ambiente’.
Tambe el a bisa cu Tesla no ta bay bende ningun di e Bitcoin cu e compania tin.
E prijs di bitcoin a cay na $49,880 den intercambio ayera mainta, e prome biaha cu el a cay bao $50mil desde comienso di maart. Accionnan di Tesla tabata pronostica pa ganashi diahuebs trempan despues di cay 4.4% diaranson.
Tesla a bisa na februari cu a inverti alrededor di $1.5 biyon den Bitcoi y tabatin plan pa cuminsa acepta e moneda digital como pago ‘pronto’. E balor den mercado husto di Tesla su holding di Bitcoin te cu dia 31 di maart tabata $2.48 biyon, segun documentonan di seguridad.
Bitcoin ta depende riba computer, cu ta depende riba electricidad, pa su existencia. E cantidad di computer y energia necesario pa esakinan ta aumentando – e balor cresciente di bitcoin ta directamente mara na e cantidad di energia cu ta usa.
Esnan cu ta mina Bitcoin ta ‘unlock’ e bitcoin door di resolve puzzle unico y compleho. Mientras e balor di bitcoin ta aumenta, e puzzle ta bira cada bes mas dificil y ta rekeri mas energia di computer pa resolv’e. Calculacion di con hopi energia Bitcoin ta usa, ta varia.
Un estudio na 2019 di investigadornan di Universidad Tecnico di Munich y Instituto di Tecnologia di Massachusetts a conclui cu, na fin di 2018, henter e red di bitcoin tabata responsabel pa 22.9 miyon CO2 pa aña – similar na un ciudad grandi den occidente of henter un pais den desaroyo manera Sri Lanka. Emisionnan global total di e gas di invernadero door di kima combustibel fossiel tabata alrededor di 37 biyon ton aña pasa.
