Diamars anochi a tuma luga un encuentro pa esunnan interesa den Bitcoin. Stefan Oosterwaal, ken ta doño di un compania cu ta acepta Bitcoin como modo di pago na Aruba a elabora riba e topica aki.
Durante e anochi por a tuma nota di e participacion activo di e audiencia y te hasta a bin preguntanan compleho y critico dilanti. E audiencia tabata consisti di un mayoria di personanan entre edad di 30 cu 48 aña. Esaki posiblemente pasobra tin potencial pa inverti den Bitcoin riba e isla.
Kico ta Bitcoin?
Bitcoin ta un cripto placa of placa digital cu a wordo crea cuminsamento di aña 2009 y cu desde e tempo ey ta creciendo rapidamente. E idea tras di Bitcoin tabata pa tin un moneda cu no ta wordo controla pa ningun estado y cu ta wordo distribui di manera peer-to-peer y descentralisa. Sr. Oosterwaal ta splica cu di e manera aki tur hende individual por ta nan mesun banco central.
E tecnologia tras di Bitcoin ta e asina yama Blockchain. Esaki ta un registracion publico digital di tur e transaccionnan cu ta tuma luga riba e red di Bitcoin network. E red aki ta consisti di tur e mashinnan rond mundo cu ta tuma parti den transaccionnan. E registracion di transaccionnan ta wordo warda riba cada mashin cu ta riba e red di Bitcoin, cual ta kico ta dun’e su caracteristica descentralisa, ya cu no tin un solo luga cu tin tur e data.
Esaki segun sr. Oosterwaal, ta kico ta duna Bitcoin su poder. Te hasta si bin un atake grandi riba e red semper lo ta posibel pa trece e red bek pasobra no ta posibel pa ataca henter e red alabes.
Pasobra e cripto placa no ta mara na ningun pais specifico, personanan por manda otro cripto placa sin tarifa halto pa manda di un pais pa otro. E no ta importa si mi tin un amigo of amiga na Merca, Zimbabwe, Francia, Argentina of Aruba mes. “Mi por manda placa na nan tur cu un tarifa igual.”
Demonstracion
Sr. Oosterwal ta splica cu pa hende cu no tin acceso na hermentnan bancario manera un cuenta di banco of credit card, Bitcoin por fungi como un alternativa, ya cu no tin rekisitonan mara na crea un cartera di Bitcoin. Durante e anochi a duna un demostracion con pa instala software di cartera pa Bitcoin. E audiencia a instala carteranan cu ta wordo ofreci pa celular y asina a wak nan prome transaccion tumando luga, cual sr. Oosterwaal a demostra.
Tin diferente manera pa obtene Bitcoin. Regularmente, segun sr. Oosterwaal, por cumpra esaki via intercambionan digital riba internet. Pero mester tene cuidou cu e intercambionan, sr. Oosterwaal ta adverti. “Ami nunca a tene mal experiencia. Loke ta importante cu Bitcoin ta cu bo mester semper tin acceso na bo yabinan priva (private keys). Si bo no tin acceso na bo yabinan priva, bo no ta doño di bo Bitcoins.”
Pa splica esaki, mester tene cuenta cu e sistema cu Bitcoin ta uza ta basa riba cripto grafia di yabi publico (public key cryptography/asymmetric cryptography). Cu e sistema aki, un persona tin 2 yabi cu ta pertenece na dje. E yabi publico, y e yabi priva. Sr. Oosterwal a uza un analogia di e yabi publico como bo e-mail adres y e yabi priva manera bo password. Bo por mustra tur hende bo yabi publico pa nan por manda bo placa, pero nunca bo mag di comparti bo yabi priva, si no nan ta horta bo placa.
E bon y malo di Bitcoin
Tin varios beneficionan cu Bitcoin ta trece, pero naturalmente tambe tin aspectonan negativo. Loke ta importante pa nota ta cu aunke e no ta uzabel tur caminda, tin varios tiendanan online cu ta acepta e cripto placa aki. Na paisnan den Europa y tambe den Merca tin tiendanan y restaurantnan cu ta acepta e cripto placa. Te hasta den e paisnan aki tin ATM di Bitcoin, unda bo por cambia placa tradicional pa cripto placa.
Loke ta negativo di Bitcoin, ta cu e prijs ta varia hopi, y e no ta stabiel. Pa hopi tempo den su historia, e prijs di Bitcoin por a bay di 100$ pa 1 Bitcoin, te 40$ pa 1 Bitcoin den un dia mes.
Segun sr. Oosterwaal, esaki ta simplemente parti di e realidad di Bitcoin, ya cu no tin un autoridad central cu ta controla su prijs, si no e mercado y red mes ta determina esaki. “Loke nos ta wak ta cu ta bin hopi innovacion den e espacio aki, te hasta cu tin servicionan den otro paisnan cu ta cambia placa den Bitcoins automaticamente pa dollar of otro valuta local pa companianan cu ta acepta Bitcoin.”
E topico di Bitcoin ta uno compleho, ya cu ta envolvi cu tecnologia y financia alabes. Pa e rason aki, sr. Oosterwal a remarca cu mester tuma tempo pa comprende completamente kico ta e efectonan di Bitcoin. “Mi ta sugeri pa personanan cu interes inverti hopi tempo pa comprende esaki, y si nan kier despues inverti un tiki placa pa wak con e ta poco poco.”
Uzo na Aruba
No ta conoci ainda kico ta e status di Bitcoin riba Aruba, pero cu e encuentronan aki sr. Oosterwaal tin speransa pa crece e comunidad cu tin interes den e topico aki. El a purba haya clarificacion di parti di gobierno encuanto cobramento di impuesto ora di uza Bitcoin, pero e no a logra haya un clarificacion. “Mi no ta kere nan sa cu e ta existi of kico e ta.”
