Despues cu investigadonan a nota menos pashent cu miopia den un hospital na China, nan a specula cu bisti bril por ofrece algun proteccion contra Covid-19.
Den un hospital na Suizhou, China, 276 pashent a wordo admiti durante un periodo di 47 dia, pero apenas 16 pashent – menos di seis porciento – tabatin miopia cu tabata rekeri nan pa bisti bril pa mas cu ocho ora pa dia. Den comparacion, mas di 30 porciento di hende den edad similar di e region tabatin mester di bril pa miopia, segun investigacion anterior.
Mirando cu e tasa di miopia tabata parce hopi mas halto den poblacion general cu den sala di covid, e cientificonan a puntra: Bisti bril por protege un persona di bira infecta cu coronavirus?
“Bisti bril ta comun entre ciudadano Chines di tur edad” e autornan di e estudio a skirbi. “Sinembargo desde brote di Covid-19 na Wuhan na december 2018, nos a observa cu tiki pashent cu bril a ser admiti den hospital.”
E observacion ‘por ta evidencia preliminar cu esnan cu ta bisti bril diariamente ta menos suceptibel pa Covid-19’, e autornan a specula. Expertonan ta bisa cu ta mucho pronto pa saca conclusion – of recomenda pa hende cuminsa bisti proteccion di wowo ademas di tapaboca pa reduci e riesgo di infeccion.
Por ta cu bril ta actua como un barera parcial, protegiendo wowo di e ‘splash’ di tosamento of nister. Otro splicacion por ta cu hende cu ta bisti bril tin menos probabilidad di frega nan wowo cu man contamina. Un reporte di 2015 a haya cu durante un ora, studiantenan mirando un les a toca nan wowo, nanishi of boca den averahe 10 biaha, maske nan no a evalua si bisti bril ta haci un diferencia.
E estudio actual, publica den JAMA Ophtalmology tabata compaña pa un comentario di Dr. Lisa Maragakis, un specialista den malesa infeccioso y profesor asocia na Johns Hopkins School of Medicine, urgiendo precaucion den interpretacion di e estudio.
