ORANJESTAD – SKOA, e directiva di tur scol catolico na Aruba, tin en total 46 scol, esaki ta 1 scol di educacion special, 5 Mavo, 26 scol basico y 15 kleuterschool. Cu esey den bista naturalmente semper tin uno of mas cu lo mester mantencion of renobacion completo.
Bon Dia Aruba a papia cu Josette Daal directora di SKOA pa asina haya un tiki mas informacion di kico ta pasando y con leu ta cu e procesonan actual. Esaki den luz di e polemica algun simannan pasa cu e scol Pius X unda e docentenan mester a sali pa asina forsa cu cierto renobacion wordo haci. Sra. Daal ta conta cu actualmente Rosa College ta den su fase final pa por keda cla despues di un aña y mei mas o menos bou di renobacion. Un aña y mei ta locual un proceso di renobacion mas o menos por dura segun e directora. Pa locual ta Frère Bonifacius cual ta un scol den hopi mal condicion, SKOA ainda ta pendiente pa e scol por wordo renoba. Nan no tin bista awo di locual ta bay sosode. St. Aluisius ta un otro scol tin un peticion pa wordo renoba y tambe Imelda kleuterschool ta riba e lista. E scol aki temporalmente a muda caba pa Dakota Shopping Paradise, Cual segun sra. Daal no ta un luga ideal. Sinembargo pa niun di e dos scolnan aki tin un bista ainda di ki dia renobacion lo por cuminsa. Sra. Daal ta sigui conta cu durante añanan nan a renoba hopi scol y SKOA semper ta haci nan best pa mantene esakinan. Manera ora tin di haber cu algo kibra of algo cu por wordo drecha inmediatamente. Pero e ta enfatisa cu trabounan grandi si ta keda bou di encargo y decision di gobierno.
Frère Bonifacius wardando pa 5 aña caba
Tur aña SKOA y otro instancianan di scol na Aruba cu ta subsidia ta entrega un presupuesto, cu prioridadnan. Na final no tin bista kico gobierno lo scoge como nan prioridad despues di un evaluacion, e ta splica. Un bon ehempel ta Frère Bonifacius cu tin ya 5 aña den e situacion aki cu ainda renobacion no a cuminsa, y ta prome biaha cu SKOA ta experencia esaki. Sra. Daal ta bisa cu te ainda e no a ricibi kehonan di mayornan pa cu e situacion den diferente scolnan. Maske cu e edificionan unda e scolnan ta keda temporalmente no ta un edificio adecua pa tin un scol. Cada scol si ta haci nan best pa haci e experiencia uno agradabel tanto pa e alumnonan y e mayornan, e ta bisa. Por ehempel e parti fastioso ta cu e muchanan no tin un luga pa pauze. Hustamente pa motibo di esaki SKOA ta motiva e scolnan pa organisa mas ‘sportdag’ pa aña, pa asina e muchanan toch por bay pafo.
