Bispo di Aña Nobo… Ta splica belasting nobo…?

Practicamente cu Aña Nobo den porta, nos por observa cu director di Impuesto ta duna rueda di prensa pa splica e cambionan cu a bin den ley di impuesto entrante 1 di januari. Cu ta diadomingo proximo…

Aki nos no ta bay den detaye na promer lugar riba e cambionan haci, esey ta otro discusion, pero mientras den cierto aspecto e departamento importante aki por a avanza, esey no ta e caso den nan obligacion di informa publico. E ronda aki por a ser haci hopi tempo pasa caba, pero no a sucede. Awor e ta manera ‘mosterd na de maaltijd’ pasobra tur otro instancia priva a tuma nan tarea di informa cliente na serio y a trece tur e cambionan aki dilanti caba. Si un empresario mester a sinta warda te awor, pa e weekend aki e core cabez di gai pa adapta su administracion, anto e lo ta hibando su negoshi na mesun nivel cu e politica di informacion di e departamento.

Pero, nos lo por haya e critica cu nos ta haciendo esaki ‘solamente pa critica’. Esey no ta e caso, pasobra e manera di actua aki no ta para riba su mes; e ta parti di un manera di anda cu informacion cu nos conoce demasiado bon di nos gobernacion. Nos ta bisa explicitamente ‘gobernacion’ y no ‘gobierno’ pasobra esaki ta fayo cu ta un constante den manera di goberna nos pais, independiente di e color cu ta na mando. Por cierto, e ta haci nos corda e introduccion di BBO na fin di 2006, unda ministerio di finanzas/departamento di Impuesto hasta tabatin un presupuesto pa duna informacion; si nos ta corda bon un suma di Afl. 30.000. Finalmente nos no a mira practicamente nada di informacion a sali for di seno di gobierno, mientras cu otro entidad, sin presupuesto, a duna informacion bastante amplio, tocante impuesto directo y indirecto, e funcionamento y bentaha/desbentaha di cierto sistema (BBO, BTW, sales tax), etc. Nos no ta corda riba kico nan lo a gasta e fondonan destina na ‘voorlichting’ pero di e ministerio ni e departamento no a sali ningun tipo di luz…

Claro cu awor ta bay trece como argumento cu ta te na mitar di december parlamento a haya e ley pa aproba. Esey ta factualmente corecto, pero esey ta culpa di parlamento, o di esnan cu mester a prepara e trayecto mas tempran y no a hacie? Ademas, di unda e partnernan den sector priva a haya nan informacion, completamente corecto tocante e cambionan aki, si no ta di e mesun ministero y/o departamento? Anto ta imposible pa e departamento mes papia y comunica tocante esaki? Ah no, ta bay bisa nos cu por a bin cambio ainda den parlamento… Esey lo causa risa solamente, pasobra ki dia e stempelparlement aki ta bay haci cambio den un ley asina elabora, cu sin duda algun a costa basta trabao pa realiza? Esey lo tabata solamente posible si a palabra di antemano cu gobierno cu ta bay haci cierto amienda, pa e fraccionnan gubernamental luci bon durante tratamento. Nos no a mira nada di esey.

Un biaha mas: no ta trece e critica aki pa ‘single out’ e departamento, pero terminando otro aña nos no ta mira mehoracion den e politica di informacion di gobernacion. Esey tin tur cos di haci cu e maneho politico, no di e departamento. Manera expresa anteriormente den e Editorial aki, gobierno hopi biaha ta mustra manera e hungador di poker cu tin su cartanan bon pega na su pecho. E hustificacion ta aparentemente pa pospone e momento cu oposicion ta haya algo pa mira mas tanto posible. Si esey ta e hustificacion, anto ‘que sea así’ pero no papia mes di un politica di informacion na pueblo. E insatisfaccion continuo cu nos kier expresa aki ta cu no solamente e informacion ta laat y no oportuno, pero cu en general esey no ta cuadra ni cu transparencia ni cu integridad. Den e caso aki mes, nos ta drentando otro aña mas sin cu tin un claridad den e asunto di reforma fiscal. Y nos no ta bay toca e asuntonan cu a atende den e actual medidanan, pero si otro asunto cu ta sumamente importante pa nos, pa gobierno, pa sector priva y e ciudadano individual. Por ehemplo, pakico no ta ni sikiera papia di un reforma drastico di e sistema di impuesto di importacion. Gobierno den mesun epoca di introduccion di BBO a haya conseho di IMF/World Bank pa termina cu e selva di tarifa di importacion y bin cu un porcentahe unico, loke lo a alivia bida di gobierno mes y di sector priva involucra den importacion. No, ta insisti cu e ciudadano ta keda paga por ehemplo e 22% idiota riba muebles, cu ta data di tempo cu nos tabata den Antiyas ainda, y tabata sirbi pa proteha industria di muebles na Curaçao. Mientras e hotelnan ta haya un ‘break’ di no paga nada ora ta redecora, e ciudadano si mester keda paga e 22% aki, a base di cual hustificacion? Nos tin industria di muebles pa duna proteccion? O ta e caso cu departamento di Douane ta protesta, pasobra nan ta contra tur cambio? Nos no ta kere cu nan mester tin miedo pa nan empleo, pasobra tin hopi otro tarea cu por haci mihor. Ta di spera cu den e aña nobo tin mas espacio pa discuti e asuntonan aki di un forma mas abierto, pero esey ta speranza, nada mas.