Recientemente oficina di turismo di Aruba (ATA) ta continua promocion di nos isla den exterior. E delegacion a biaha pa Alemania pa un biaha mas forma parti di e bolsa di turismo mas grandi na mundo, esta ITB.

Esaki ta segun e comunicado cu nos a ricibi di e oficina di turismo.

Aki ta unda diferente autoridad y companianan di mas di 180 pais ta participa anualmente na ITB na Berlin, Alemania. Esaki ta e bolsa mas grandi riba nivel global di biahe y turismo. ‘Experiencia y Expertonan’ ta e enfoke principal di e evento caminda miles y miles di profesional ta bini hunto pa tuma decision, cera acuerdonan y haya e informacion di mas nobo pa nan destinacion. Aki A.T.A. tabatin oportunidad di sinta cu socionan importante manera TUI/KLM ademas di otro companianan for di Inglatera, Italia, Alemania y paisnan Scandinavo.

Previo na e asistencia na ITB, director di ATA Ronella Tjin Asjoe-Croes hunto cu CMO Sanju Luidens-Daryanani como tambe director di ATA Europa Tirso Tromp, a sostene reunion cu ekiponan cu ta representa e entidad di promocion y maneho di Aruba na diferente pais na Europa. Adicionalmente a reuni cu e ekipo y hotelnan acerca, unda a pasa riba cada mercado cu e proposito di analisa e resultadonan obteni te cu awo pa cu turismo pa Aruba y repasa e pasonan necesario pa alcansa e metanan stipula segun e plan di ATA di Aruba su turismo na 2018.

Otro reunion importante cu a tuma luga durante e mision pa Europa, ta esun sosteni cu director di promocion di oficina di turismo di Peru -Maria Soledad Acosta Torrelly- caminda a papia di un posibel ‘dual destination’. Esaki ta nifica cu ambos destinacion ta traha hunto riba un opcion cu ta mustra di ta popular caba na Italia unda 10% di e turistanan ya ta combina nan bishita pa Peru hunto cu un bishita pa nos isla. E idea ta pa expande esaki y tambe replica esaki na Alemania y Inglatera. Un oportunidad clave cu ATA ta spera di por concretisa pa medio di e.o. un vuelo nonstop di Lima, Peru.

Ademas a probecha pa sostene reunion entre Aruba, Corsou y Boneiro cu dicho representantenan di cada isla. Aki a reuni riba diferente topico y a intercambia ideanan di ‘inter-island connections’ como punto principal di agenda.