Diadomingo ultimo prinses Laurentien tabata di bishita cerca representantenan di Aruba Tourism Authority (ATA) y socionan envolvi den Raad van Kinderen, entre otro Aruba Investment Bank, maestronan di scol, representantenan di Ministerio di Educacion y Global Shapers.
Durante e bishita aki, prinses Laurentien a presenta un idea nobo “Kids Moving the World”. Por medio di e iniciativa e ta desea pa entre otro duna nos muchanan e poder pa asina nan mes por logra mas. Caminda ta permiti e muchanan ta envolvi den escogencia di proyectonan cu nan ta haya tin balor agrega pa nos medio ambiente, comunidad of industria turistico. E fondo di Kids Moving the World ta duna e muchanan mas responsabilidad compara cu e plataforma Raad van Kinderen. Esaki ta duna nan mas oido y confiansa cu nan tambe tin e poder pa cambia cosnan.
Durante e bishita a discuti diferente otro idea y forma pa envolvi muchanan den e diferente trayectonan. E programa ‘Very Important Kid Program’ ta un ehempel con ATA ta atrae muchanan y entusiasma nan pa bishita diferente sitio cu tambe un ‘Very Important Kid Passport’ pa mustra cu nan a bishita tur e sitionan. Banda di esaki a discuti tambe e Aruba Certification Junior Program, pa yuda amplia nan conocemento di Aruba y Turismo.
