Un total di cuater website di porno ta den e top cincuenta webistenan mas bishita pa usuarionan na Aruba. Esaki ta segun e ranking cu ta wordo duna pa e compania Alexa.com cu ta e compania mas grandi di analysis digital.
Tabata durante siman cu boletinextra.com a publica cu e website pornhub ta den e top 30 di e websitenan mas bishita aki na Aruba. E informe aki a haya un ola di reaccion na momento cu conocido Edmond Croes a publica esaki riba su pagina di Facebook personal, haciendo e pregunta si kisas mester prohibi esaki pa nos pais.
Bon Dia Aruba a verifica esaki y a tuma nota cu apart di pornhub, tin tres otro website esta bongacams, txxx y chaturbate cual ta esun cu ta rank mas halto na posicion 17. Cu esaki por conclui cu bishita di websitenan pornografico ta algo normal na Aruba.
Nos por a tuma nota tambe cu websitenan di pirateria di pelicula tambe ta wordo hopi bishita y nan ta rank na posicionnan hopi halto. A tuma contacto cu un experto den ley y e la splica cu no tin leynan na Aruba pa loke ta uzo di internet pa cual e ta un mercado hancho habri. E experto ta bisa: “Si tin algo regla mes e lo ta hopi limita y desconoci pa pueblo.”
