Fin di siman cu a pasa, lider di MEP, sra Evelyn Wever-Croes, hunto cu un grupo di sostenedor, a bishita e bario di Simon Antonio. Habitantenan di Simon Antonio tambe ta pidi pa un cambio. Mayoria ta expresa cu e problema di mas grandi di e bario ta e dump. Sra Croes ta elabora riba e situacion aki:
“Nos a scucha y tuma nota di cada preocupacion cu ta biba den cada cas cu nos a bishita. E Problema di dump ta uno cu ta existi desde cu AVP a sintana 2009. Pa MEP e preocupacion aki lo wordo atendi mesora cu nos ta den Gobierno. Dump tabata un problema cu na aña 2009 a cuminsa mira solucion. E candela riba dump a wordo paga na 2008, y na 2009 e planta a wordo inaugura cu mester a cuminsa procesa e sushi y baha e sero di sushi. Esey tabata e vision di gobierno di MEP y ex-minister BooshiWever.
Sin embargo gobierno a cambia, y e gobierno di sr. Mike Emana boycotia e proyecto di dump. Mas tristo ta cu a boycotia e proyecto existente, benta 28 miyon florin di pueblo afo, y sin bin cu otro alternativa te dia di awe. Awor ta mas obvio cu nunca cu sr. Mike Eman ni su gobierno no tin vision real con pa atende cu e problema di dump.
SOLUCION DI MEP
Nos a presenta nos solucionnan na mas di un ocasion, lo mi ripiti nan den 3 paso simple.
Paso 1: paga e candela riba dump
Paso 2: percura pa procesa e sushi cu ta wordo treci eynan diariamente mesora
Paso 3: percura pa baha e sero di sushi existente, of en todo caso trata e sero di sushi pa evita cu e ta sigui pega na candela y pa e no ta un molester mas.
Ta asina so e molester y holo di huma por pasa pa pasado y e habitantenan por haya un alivio. Pues tin solucion pa e problema di dump, sinembargo den e gobierno actual falta vision, determinacion y curashi. Nos di MEP lo sigui lucha te ora nos logra, pasobra e area di Parkietenbos y Simon Antonio merece miho!” tabata palabranan di lider di MEPsra. Evelyn Wever-Croes.
