Ayera un medio di comunicacion local a publica riba su frontpage cu e futuro prome minister di Corsou, Gilmar “Pik” Pisas no a wordo ricibi pa prome minister demisionario di Aruba, Evelyn Wever-Croes.
Segun e corant a indica cu como lider di un pais cu a yega di papia cu mester tin un bon laso di cooperacion entre paisnan den Reino Hulandes, tabata di spera cu dialuna ultimo prome minister demisionario Evelyn Wever-Croes lo a ricibi bishita di e proximo prome minister di Corsou Gilmar Pisas.
Despues cu esaki a wordo publica, Gobierno di Aruba a manda un comunicado pa tur medio di comunicacion pa informa cu esey no tabata berdad, manera hopi hende por a ripara Pisas a bin Aruba fin di siman ultimo den plan di vakantie y a reuni cu algun amigo pero esaki no tabata un bishita oficial.
Den e comunicado a aclaria cu Wever-Croes no a nenga di ricibi Pisas y cu tampoco e nunca a nenga di ricibi ningun colega di Corsou of di otro pais den Reino. Tambe el a destaca cu e no a haya un peticion di Pisas pa un reunion.
“Mi a compronde cu e lo tabata na Aruba riba un biahe priva y mi ta contento cu el a scoge Aruba pa descansa. Semper portanan di nos gobierno ta habri pa ricibi tur nos coleganan di Corsou, mescos cu na otro pais den Reino,” Wever-Croes a enfatisa.
Bon Dia Aruba a purba di haya un entrevista cu Pisas pero esey no a logra, ya cu el a opta pa desisti di entrevista. Pisas tin un carera amplio den politica, despues cu prome e tabata traha como polis. Na aña 2016 el a keda eligi como miembro di Staten di Corsou, cu 3.000 voto, y na februari 2017 el a bira presidente di Staten y na maart di e mesun aña ey el keda huramenta como prome minister di Corsou. Su gabinete a haya apoyo di 12 di e 21 miembronan di Staten incluyendo esunnan di su partido Movemento pa Futuro Korsou.
Actualmente ta tumando lugar e proceso di screening di e candidatonan pa e puestonan di minister y ora esaki keda conclui, por huramenta e gobierno di coalicion nobo, entre MFK y PNP.
