Den forma di cortesia, Aruba su mandatario encarga cu Turismo, Dangui Oduber, a haya bishita di Minister di Turismo di Islanan Caiman, honorario Moses Kirkconnell, kende fuera di ta mandatario di Turismo, ta tambe vice presidente di Islanan Caiman.
Islanan Caiman ta consisti di 3 isla, cual ta Grand Cayman, Cayman Brac y Little Cayman, cual ta keda na e parti nort west di Jamaica. Nan tin un poblacion di alrededor di 60 mil persona. Notabel ta cu no obstante di tin e mita di poblacion di Aruba, Islanan Caiman ta draai un turismo mas fuerte. Esaki mas cu claro a haci e bishita di Kirkconnell uno special, ya cu durante e reunion por a intercambia ideanan nobo pa ambos pais. Oduber: “Islanan Caiman sigur ta un teritorio cu Aruba por siña hopi di dje. Un cooperacion y intercambio ta nada mas cu beneficio pa Aruba.”
Entre combersacion di ideanan, e mandatarionan di ambos pais a papia tambe riba factornan cu a afecta e islanan. “Ora bo siña di bo propio retonan ta bon, pero ora bo por siña con un otro a soluciona su retonan, ta mas miho ainda. Esaki ta haci cu bo ta miho prepara pa cualke eventualidad”, Oduber a expresa.
Turismo ta e pilar economico mas importante di Aruba su economia y p’esey su desaroyo ta keda uno di prioridad. Oduber, conhuntamente cu e gobierno aki, ta para pa turismo di calidad; e turista cu ta bin pa gasta placa y contribui na nos economia. Pa Oduber ta hopi cla cu lo haci tur cos necesario pa eleva e calidad aki, percurando asina cu cada un ciudadano por tin un bon calidad di bida.
