E siman aki e comision permanente di parlamento encarga cu asuntonan referiendo companianan estatal tabatin un reunion cu representantenan di Citgo Aruba. Parlamentario Andin Bikker ta pa casi 8 aña presidente di e comision encarga cu companianan estatal, bow cual awor entre otro e Refineria di Aruba NV (RDA) ta resorta.
Parlamentario Bikker a recorda cu ta su mocion a pone cu a instala un comision pa explora e reapertura di e refineria, ya cu gobierno a expresa e tempo ey di tin intencion pa bay desmantela e facilidadnan. Banco Central recientemente a saca un rapport unda cu basicamente ta bisa cu e crecemento economico premira pa aña 2017 ta grandemente basa riba e inversionnan den condiciona e refineria di nobo pa su reapertura.
E situacion aki ta pone cu Parlamento for di punto di bista di e presupuesto di pais Aruba tin e deber y obligacion di basicamente monitor con un inversion asina grandi y importante pa pais Aruba ta canando. A base di esey sr. Bikker a dicidi di invita RDA y Citgo pa reuni cu e comision pa asina por haya mas informacion. Segun parlamentario Bikker un par di siman pasa e comision a reuni cu Refineria di Aruba NV y dialuna ultimo a reuni cu Citgo. E Parlamentarionan di diferente fraccion cu tabata presente a haci diferente preguntanan y cu por bisa den liñanan grandi cosnan ta cana segun e plannan calcula. Presidente di e comision, mr. Andin Bikker ta kere cu si mas despues mester mas informacion lo invita RDA of Citgo un biaha mas.
Sinembargo na e momentonan aki lo bay pidi un reunion cu gobierno mirando cu siman pasa por a tuma nota cu cierto acuerdonan a wordo firma y como parlamentario tin e derecho pa haya informacion for di Gobierno mes, ya cu parlamento su tarea principal ta pa controla Gobierno.
