E caminda grandi di Bloemond rumbo pa Sero Pita ta uno cu lamentablemente hopi accident ta tuma luga. Automobilistanan ta core cu velocidad halto y e caminda tin hopi curva cu ta hopi biaha no ta laga bon bista di e trafico contrario.

Tin varios crusada riba e caminda aki cu ta peligroso pa mesun motibo aki, curvanan ta crea ‘blinspots’ y ta haci e visibilidad dificil pa e automobilistanan cu ta sali pa subi riba e caminda grandi.

Tal ta e caso di un accident cu a tuma luga diadomingo na un di e biradanan aki na unda un Hyundai accent tabata saliendo pa subi riba e caminda grandi y no a mira e auto biniendo for di Bloemond.

Segun informacion di e chauffeurnan envolvi den e accident, e tabata core e auto cu tabata subiendo riba e caminda grandi pero no a wak e auto door cu net prome cu e crusada tin un curva, na ambos banda di e caminda, y ta haci esaki un ‘blindspot’. Pa ora el a wak e auto tabata laat y a pesar cu el a purba evita e golpi, no a logra.

El a remarca cu habitantenan di e bisindario mes, pa motibo di e cantidad di accidentnan cu ta tuma luga na e crusada aki y e peliger cu hopi di nan ta core na momento cu nan tin cu sali y subi e caminda grandi, nan mes a tuma e iniciativa di pone spiel dilanti di e crusada pa yuda cu e visibilidad.

“E birada ta hopi peligroso. Mi conoce varios hende caba cu a haya accident eynan. Y e peligroso ta cu e autonan cu ta core riba e caminda grandi aki, ta core riba un velocidad hopi halto. Den mi caso, danki Dios cu e golpi no tabata directo, e golpi a pasa na e skina patras di e bumper banda di chauffeur y asina mes e tabata duro. Danki Dios tambe cu no tabatin ningun herido,” e chauffeur a indica.

Mesun situacion ta pasa na e birada di Prof. Laurentsstraat na unda frecuentemente, riba medionan di comunicacion, tin accidentnan pisa ta tuma luga pa motibo cu autonan ta core riba velocidad hopi halto riba e caminda di preferencia y ta lubida di baha velocidad ora cu yega na e crusada.

E entidadnan encarga mester pone atencion y soluciona e problemanan aki prome cu mas accidentnan fatal tuma luga y hende inocente perde nan bida.