Bikker: Un tercio di atraconan cometi pa stranhero ta ‘substancial’

Di cifranan cu Cuerpo Policial (KPA) a saca siman pasa, por conclui cu dos tercer di atraco ta cometi pa personanan local. E mandatario encarga cu husticia, Andin Bikker (POR) sinembargo ta haya cu un tercer parti di atraco cometi pa stranhero ta ‘hopi substancial’.

Crimen ta un materia compleho. Tin hopi factor social, personal y di maneho cu por hiba personanan na comete crimen. Asina mes Minister Bikker a indica cu gobierno a constata cu tin un corelacion entre e situacion na Venezuela y e situacion di siguridad na Aruba. P’esey, pa medio di e fondo cu a haya di Hulanda, ta purba ataca e problema aki.

Di e fondo aki, tin partinan ta destina pa optimalisa facilidad di Guarda Nos Costa (GNC) mirando cu desde 3 di juli ta hibando un maneho di Schipholmodel y Dublinmodel. Alabes ta reforsa KPA y KIA. Schipholmodel ta encera cu peticionario di asilo ta haya un temporada corto riba cual ta revisa nan caso pa mira si nan peticion tin merito, mientras Dublinmodel ta encera cu persona cu pidi asilo na un pais automaticamente ta prohibi di drenta otro pais y ta manda e persona bek unda a haci e peticion original.

E mandatario a sigura cu Hulanda ta reconoce e ‘trickle down effect’ aki, pues pa e rason aki a dicidi di duna Aruba e apoyo por medio di e fondo.