“Desde cu fronteranan a habri, nos por expulsa ilegalnan Venezolano manera normal.” Asina mandatario encarga cu husticia ta aclaria riba asunto di expulsion.
Segun nos partner den noticia Ret Karibense a publica riba 16 di maart, Venezolanonan ilegal cu keda descubri na nos isla no lo keda cera pa despues gobierno deporta nan. Esaki pa via di ceramento di frontera entre Venezuela y islanan ABC. Sinembargo durante un conferencia di prensa na Dimas cual nos a comparti via nos Facebook Live, minister di husticia Andin Bikker (POR) a aclaria cu aunke e ahuste den maneho a tuma luga, actualmente ‘practicamente nada no a cambia’.
Sr. Bikker a indica cu no obstante ki nacionalidad un persona cu ta permanece ilegalmente na nos isla tin, ora autoridad haya nan lo tuma pasonan pa expulsa tal personanan. E confusion aki lo a bin ora e mandatario a saca un comunicado indicando cu gobierno no lo por deporta personanan Venezolano mirando decision di gobierno Venezolano pa cera frontera cu nos isla. Esaki a haci cu gobierno a ahusta maneho unda personanan Venezolano por a extende estadia turistico si tin fondo pa permanece na nos isla independientemente of busca un persona local cu lo kier para como garante pa nan estadia.
Durante e tempo cu e maneho aki tabata na vigor tabata exigi pa Venezolanonan meld sea semanalmente of diariamente, dependiendo si nan tabata na nos isla como turista of a haya nan como ilegal. Originalmente gobierno lo a suspende nan deportacion te cu espacio aereo entre e paisnan habri bek.
